„Grimmileg aðför Icelandair að Flugfreyjufélagi Íslands er óskiljanlegur afleikur og mistök,“ segir Jóhanna Sigurðardóttir í pistli á Facebook síðu sinni. Jóhanna er fyrrverandi forsætisráðherra Íslands en hún var líka formaður Flugfreyjufélags Íslands á sínum tíma. Verkalýðsbarátta hefur alltaf verið Jóhönnu hjartans mál.

Í dag sleit Icelandair samningaviðræðum við Flugfreyjufélag Íslands og öllum flugfreyjum og flugþjónum sagt upp.  Icelandair ætlast ekki til vinnuframlags af þeim nema fram til mánudags. Þá herma heimildir DV að þegar séu hafnar viðræður milli Icelandair og Íslenska flugstéttarfélagsins.

Jóhanna heldur áfram:  „Halda forsvarsmenn félagsins virkilega að það sé leiðin út úr vandanum að knésetja flugfreyjur/flugþjóna og stinga þau í bakið? Trúa þeir því í raun og veru að þetta sé leiðin að liðsinni lífeyrissjóðanna og stjórnvalda? Hvílík heimska. Með því að sniðganga Flugfreyjufélag Íslands er verið að færa verkalýðsbaráttuna meira en öld aftur í tímann þar sem launafólk, ekki síst konur, var beitt kúgun, ofbeldi og hótunum af atvinnurekendum. Hvaða fordæmi er verið að skapa með svona ógnarstjórnun? Að atvinnurekendur geti bara leitað á önnur mið ef launþegar lúta ekki vilja þeirra? Þá sé leiðin bara að lama verkalýðshreyfinguna og stuðla að annars konar stéttarbaráttu þar sem leikreglur atvinnurekenda ráða för? Við þessar aðstæður getur ríkisstjórnin ekki setið hjá aðgerðalaus. Hún hefur þá skyldu að forða gífurlegum átökum á vinnumarkaði sem enginn sér fyrir endann á.“