Hinu goðsagnakennda Ögurballi hefur verið aflýst í ár. Ballið hefur verið haldið í marga áratugi í samkomuhúsinu á Ögri, Ísafjarðardjúpi, sem var byggt árið 1926. Það átti að fara fram annað kvöld, laugardagskvöld.

Halldór Halldórsson, einn skipuleggjandi viðburðarins greindi frá aflýsingunni á Facebook-síðu sinni í kvöld.

Í samtali við DV sagði Halldór að erfitt væri að glíma við náttúruöflin, en svakalegt veður hefur verið á Vestfjörðum sem orsakaði appelsínugula stormviðvörun, eitthvað sem er ekki algengt í júlí.

Halldór segir að ballið hafi verið haldið flest ár frá byggingu samkomuhússins, 1926, en því er ballið næstum því aldargamalt. Því fylgja margar hefðir, til dæmis er ætlast til af veislugestum að fá sér rabarbaragraut með rjóma.

Að þessu sinni átti að halda það úti vegna smithættu af COVID-19, en vegna veðurs var það ekki hægt. Í staðinn verður einhver „pöbbastemming“ í samkomuhúsinu í Ögri að sögn Halldórs. Það verður þó einungis opið til 23:00 líkt og reglur um samkomur leyfa.

Halldór segir að þá verði bara að hafa gaman á Ögurballi að ári.