„Það eru engin ný tíðindi af þessum fundi. Þetta var bara upplýsingafundur sem við höldum mjög reglulega til að halda fólki upplýstu og svara spurningum. Ekkert var tilkynnt um uppsagnir á þessum fundi,“ segir Ásdís Ýr Pétursdóttir, upplýsingafulltrúi Icelandair, í samtali við DV, í tilefni starfsmannafundar sem Icelandair hélt í dag.

Ásdís bendir á að reglulegir upplýsingafundir séu nauðsynlegir á þessum tímum þegar stór hluti starfsmanna vinnur heima hjá sér.

Margir starfsmenn áttu hins vegar von á að tilkynnt yrði um fjöldauppsagnir í dag. Af því varð ekki. Aðspurð segir Ásdís ekki liggja fyrir núna hvenær tilkynnt verði um uppsagnir. „En það verður tilkynnt þegar það liggur fyrir. En það voru engin tíðindi á þessum fundi. Þetta var bara einn af þessum reglulegu upplýsingafundum.“

Ásdís viðurkennir að uppsagnir hafi verið til umræðu á fundinum og reynt að bregðast við spurningum fólks en engar nýjar upplýsingar hafi komið fram fram yfir það sem áður hefur verið tilkynnt um.

Fyrsti maí er næstkomandi föstudag og má gefa sér að tilkynnt verði um uppsagnir fyrir þann tíma. Icelandair sagði upp 240 starfsmönnum í síðasta mánuði og minnkaði starfshlutfall hjá meirihluta starfsmanna.