Maður var í morgun dæmdur í tveggja og hálfs árs fangelsi við Héraðsdóm Reykjavíkur fyrir nauðgun. Maðurinn nauðgaði konu eru þau voru saman í húsi eftir þorrablót. Meðal sönnunargagna voru sms skilaboð sem maðurinn sendi konunni síðar um nóttina, eftir verknaðinn, en þar segir:
„Nenniru að segja mér að þetta hafi verið martröð? Ef ég man þetta rétt þá tek ég því hvað sem þú vilt gera.
Disess kræst.. veit ekki hvar á að byrja.. veist að ég dýrka þig, trúi ekki að ég hafi gert þér þetta ojbarasta langar ekki að lifa!!“
Atvikið átti sér stað 21. janúar árið 2018. Konan sem varð fyrir nauðguninni var gestkomandi hjá vinkonu sinni og þar var einnig ákærði, fyrrverandi sambýlismaður vinkonunnar. Þau þrjú höfðu verið að skemmta sér saman á þorrablóti um kvöldið en fóru heim til vinkonunnar, drukku áfengi, hlustuðu á tónlist o.s.frv. Brotaþoli vaknaði um morguninn með líðan og minningar um að hinn ákærði hefði klætt hana úr sokkabuxum og nærbuxum og haft við hana samfarir.
Brotaþoli fór úr íbúðinni grátandi og hringdi í vinkonu sína sem fór með hana á neyðarmóttöku slysadeildar Landspítalans í Fossvogi. Næstu daga greindi hún sínum nánustu frá nauðguninni og leitaði til sálfræðings.
Framburður konunnar fyrir dómi var metinn trúverðugur og í samræmi við gögn málsins. Ákærði neitaði sök en sagðist muna lítið um atburði næturinnar vegna áfengis- og amfetamíneyslu. Framburður hans þótti vera ruglingslegur. Maðurinn viðurkenndi að hafa gyrt niður um konuna og að hann hafi verið með vonda tilfinningu þegar hann vaknaði undir hádegi næsta dag. Þrátt fyrir þetta neitaði hann að hafa nauðgað konunni. Gögn um sms-sendingar hans eru einnig mikilvæg hvað varðar sakfellingu. Gögn sálfræðinga um ástand konunnar falla mjög vel að framburði hennar og styrkja hann.
Var maðurinn fundinn sekur um nauðgun og dæmdur í tveggja og hálfs árs fangelsi. Hann er dæmdur til að greiða konunni 1,8 milljónir í miskabætur auk vaxta og að greiða allan sakarkostnað málsins til ríkissjóðs, sem nemur rúmlega 2,5 milljónum.
