Rannsóknarnefnd samgönguslysa hefur lokið vettvangsrannsókn vegna flugslyssins sem varð við Múlakot í Fljótshlíð í gærkvöldi. Þetta kemur fram í frétt á mbl.is. Í fréttinni er rætt við Ragnar Guðmundsson hjá rannsóknarnefndinni. Að sögn hans stóð rannsókn yfir í alla nótt.
Flak vélarinnar verður nú flutt í rannsóknarskýli til frekari rannsóknar en Ragnar segir að vettvangur slyssins hafi verið mjög stuttur. Af myndum að dæma virðist flugvélin hafa skollið skarpt niður. Þá segir hann að eldur hafi komið upp í vinstri væng flugvélarinnar en getur að öðru leyti ekki tjáð sig um rannsóknina.
Lögreglunni barst tilkynning um flugslys nálægt flugvellinum við Múlakot í Fljótshlíð rétt eftir hálf níu í gærkvöldi. Fimm manns voru í einkaflugvélinni. Eldur var þá laus í flugvélinni en fjölmennt lið lögreglu, slökkviliðs og sjúkraflutninga HSU, ásamt tveimur þyrlum Landhelgisgæslunnar fóru á staðinn. Rétt fyrir klukkan þrjú í nótt tilkynnti lögreglan á Suðurlandi að þrír hefðu látist og tveir slasast alvarlega.
