Óhætt er að segja að Sindri Guðjónsson, formaður Vantrúar og starfsmaður Utanríkisráðuneytisins, varpi fram sprengju í mál málanna í dag, brottvísun albanskrar móður til heimalands síns, Albaníu. Sindri skrifar á Facebook-svæði sitt: „Ég er í stuði fyrir að segja hlutina hreint út, og ég nenni ekki að vera meðvirkur. Hvað finnst fólki að við ættum að taka við mörgum ófrískum albönskum konum (með meðgönguvanda)?“

Hann útskýrir mál sitt svo nánar í athugasemdum, en á örstuttum tíma hefur verið skrifaður talsverður fjöldi athugasemda. „Í Albaníu ganga þær sögur að ófrískar konur geti farið til Íslands og fengið ókeypis þjónustu og þá sérstaklega ef búið er að greina þær með einhver vandamál. Ekki hjálpaði þegar allir fjölmiðlar í Albaníu sögðu frá fjölskyldunum sem fengu íslenskt ríkisfang upp úr þurru eftir hælisumsóknir sem áttu ekki við rök að styðjast, eftir geðþóttaákvörðun löggjafarvaldsins,“ skrifar Sindri.

Hann segir konuna hafa augljóslega komið til landsins með tilhæfulausa umsókn. Ein vinkona hans segir í athugasemd að kona sem sé svo ólétt þurfi ekki á þvingaðri flugferð að halda. „Fyrst hún var að koma hingað ólétt með sennilega bersýnilega tilhæfulausa hælisumsókn, að hún verði bara þola þetta,“ svarar Sindri.

Önnur vinkona hans spyr hvort þetta sé algengt og því svarar Sindri: „Ég er ekki með tölur á mér, en það er stór íþyngjandi hópur Albana sem sækir um hæli hér, til að fá sjúkraþjónustu fyrir sig, börnin o.s.frv. Það eru mörg dæmi t.d. um börn sem fá mjög dýrar og langar meðferðir og alls kyns úrræði, flóknar aðgerðir og langar innlagnir, og meira að segja í einu tilviki sem ég þekki til, ferðir erlendis í aðgerðir sem ekki er hægt að framkvæma hér (sá einstaklingur var að vísu ekki Albandi)!, á meðan verið er að greiða úr oft mjög langsóttum og hæpnum hælisumsóknum þeirra. Ég þekki mörg dæmi um ófrískar albanskar konur sem hafa sótt um hæli á Íslandi (síðan ég vann í málaflokknum). Fyrir mína parta kemur ekki til greina að við förum að reka alþjóðlegt heilbrigðiskerfi á Íslandi. Við erum 400.000.“