Mikið hefur verið fjallað um afleiðingar uppljóstrunar Kveiks og Stundarinnar um mútugreiðslur Samherja. Namíbískir miðlar hafa þá verið duglegir þegar kemur að því að greina frá málinu en Samherji hafði mikil áhrif á Namibíu þar sem mikill hagnaður fór úr landinu vegna fyrirtækisins.
Í miðlinum The Namibian er greint frá því að Jóhannes hafi talið líf sitt vera í hættu á ferðum sínum í Namibíu. „Öryggi mitt hefur verið mér mikið áhyggjuefni síðan ég fór fyrst þangað á ferðum fyrirtækisins og líf mitt var í hættu,“ segir Jóhannes í The Namibian.
„Ég ferðaðist með lífvörðum þegar þess gerðist þörf. Auk þess vann ég með stjórnvöldum í sumum löndum til að vera viss um öryggi mitt. Það verða ábyggilega flestir uppljóstrarar í heiminum fyrir persónulegum árásum í þeim tilgangi að rýra trúverðugleika þeirra. Þeir sem vilja stöðva uppljóstrara eiga það til að maka skít á þá með það að markmiði að saxa á trúverðugleikann. Ég verð ábyggilega engin undantekning frá þessu og þeir sem vilja stoppa mig muna að öllum líkindum ráðast á mig persónulega, ég býst við því.“
Jóhannes heldur áfram og talar um það þegar árásirnar byrjuðu. „Árásirnar byrjuðu fyrir þremum árum held ég, það var þegar ég fór frá fyrirtækinu,“ segir hann. „Nú þegar sannleikurinn er kominn í ljós þá getum við búist við miklu meira. Við verðum að hafa það í huga að þeir sem eru á bakvið spillinguna hafa ekkert annað til að verja sig með. Þess vegna er líklegt að þeir ráðist á manneskjuna sem stígur fram en sönnunargögnin tala fyrir sig.“
