Stórleikarinn Chris Pratt, sem er mörgum kunnur úr kvikmyndunum Guardians of the Galaxy og Jurassic World, er nýkominn til Íslands. Pratt er á landinu við tökur á myndinni The Tomorrow War en fleiri stórstjörnur á borð við J.K. Simmons fara með hlutverk í myndinni. Bandaríska leikkonan Betty Gilpin, sem slegið hefur í gegn í sjónvarpsþáttunum Glow, er einnig sögð leika í myndinni.
Pratt hefur verið duglegur að deila myndum af dvöl sinni á samfélagsmiðlum sínum og hefur hann lýst landinu sem köldu, fallegu og morandi í klaka. Einnig kom það honum á óvart þegar hann komst að því að til væru fyrirbæri sem væru upphækkaðir jeppar.
Myndin, sem bar upphaflega vinnuheitið Ghost Draft, á að gerast í framtíðinni þar sem mannkynið er að tapa stríði við geimverur. Til að vinna stríðið finna vísindamenn leið til að sækja hermenn úr fortíðinni. Það er Truenorth sem sér um aðstoð við framleiðslu myndarinnar hér á landi en þetta er þriðja Hollywood-myndin sem verður væntanlega í tökum á Íslandi í haust. Hinar tvær eru Eurovision-mynd Wills Ferrell og svo heimsendamynd Georges Clooney. Báðar eru framleiddar fyrir streymisveituna Netflix.
