„Seinni hluti gagnanna birtist eftir tvær til þrjár vikur samhliða umfjöllun arabísku sjónvarpsstöðvarinnar Al Jazeera og mögulega kemur þar við sögu annar fjölmiðlanna sem hafa verið í þessu samstarfi. Í kjarnanum er verið að tala um sama hlutinn og í umfjölluninni sem birtist í gær, en það hefur hver sína áferð í nálgun og Al Jazeera fer aðra leið að málinu sem ég held að verði mjög forvitnileg fyrir fólk að sjá. Þeir koma með aðra nálgun í framsetningu en ég ætla ekki að taka þetta frá þeim með því að opinbera það,“ segir Kristinn Hrafnsson ritstjóri Wikileaks í viðtali við DV.
Al Jazeera er víðfræg alþjóðleg sjónvarpsstöð en að sögn Kristins eru það ekki fjárhæðirnar í Samherjamálinu í Namibíu sem vekja áhuga stöðvarinnar heldur hitt að hér sé um að ræða lykilsögu varðandi framgöngu vestrænna fyrirtækja í Afríku:
„Þarna er í fyrsta lagi komið mjög skarpt sýnidæmi um atferli af þessum toga. Í annan stað þá er þetta sjávarútvegsheimurinn þar sem Samherji hefur mjög sterka stöðu og er á meðal 30 stærstu fyrirtækja hvað veltu snertir í hefðbundnum sjávarútvegi, ef við lítum framhjá fiskeldi. Þessi geiri er mjög ógagnsær og ég þekki það sem blaðamaður að það er auðveldara að fá upplýsingar úr alþjóðlega áliðnaðinum en sjávarútveginum. Þarna kemur dæmi sem Al Jazeera hefur áhuga á því þeir láta sig málefni Afríkuríkja varða þar sem sjóræningjaveiðar hafa verið stundaðar um árabil.“
Samherji birti yfirlýsingu í gær þar sem uppljóstrarinn Jóhannes Stefánsson var gerður ábyrgur fyrir mútugreiðslum Samherja í Namibíu og sagt að fyrirtækinu hefði ekki verið kunnugt um atferli hans þar fyrr en nýlega. Kristinn gefur lítið fyrir þessar skýringar:
„Þetta heldur engu vatni miðað við þá afhjúpun sem birtist í gögnunum og þeim viðbótargögnum sem blaðamenn hafa aflað sér og munu birtast. Í fyrsta lagi að skella skuldinni á mann sem hafði takmarkaða prókúru hjá fyrirtækinu og gögnin staðfesta að stærstu fjármálafærslunar voru samþykktar og jafnvel framkvæmdar af yfirstjórn fyrirtæksins. Í annan stað þá kemur fram hjá Kveiki og Stundinni að fjármálafærslur frá leynifélagi Samherja á Kýpur til leynireikningsins í Dubai ná allt fram á þetta ár en Jóhannes hætti störfum hjá Samherja árið 2016. Það er einkennilegt að reyna að halda því á lofti að uppljóstrarinn sé ábyrgur fyrir greiðslum sem eru að berast frá þessu félagi meira en tveimur árum eftir að hann lætur af störfum. Þá sjá menn í hendi sér að þetta er ákaflega eymingjaleg skýring hjá Samherja sem stenst enga skoðun.“
