Bílaleigan Carson hóf nýlega starfsemi í Akralind í Kópavogi. Að baki henni standa sömu aðilar og stóðu að baki bílaleigunni umdeildu Procar.
Uppljóstrun Kveiks
Fréttaskýringaþátturinn Kveikur upplýsti í febrúar um að bílaleigan Procar hefði átt við kílómetrastöðu notaðs bílaflota síns til að fá fyrir þá hærra söluverð. Dæmi voru um að kílómetrastaða hefði verið lækkuð um allt að 105 þúsund kílómetra. Gunnar Björn Gunnarsson, forstjóri Procar, afþakkaði viðtal við fréttamenn Kveiks en kvaðst ekkert kannast við að átt hefði verið við kílómetramæla. Gögn sem Kveikur hafði undir höndum bentu þó á hið gagnstæða þar sem aðgangur Gunnars að tölvukerfi bílaleigunnar hafði verið notaður til að skrá lækkaða kílómetrastöðu. Einnig sýndu gögn fram á að annar starfsmaður Procar, Smári Hreiðarsson, hafi í tug tilfella hið minnsta breytt stöðu kílómetramæla.
Í kjölfar Kveiksþáttarins gaf Procar frá sér yfirlýsingu þar sem beðist var afsökunar á hátterninu en sömuleiðis fullyrt að fyrrverandi starfsmaður bæri ábyrgð á málinu og ekkert hefði verið átt við kílómetramæla síðan 2015. Einnig var fullyrt að mælar hefðu aðeins verið niðurfærðir um 15 til 30 þúsund kílómetra. Í framhaldi af yfirlýsingunni fór Stundin yfir gögn tuttugu bíla Procar þar sem mælunum hafði verið breytt á árinu 2016 og komst að því að mælar voru jafnvel færðir niður um allt að 105 þúsund kílómetra. Yfirlýsing Procar var því í megindráttum röng. Í kjölfar fréttaflutnings ákváðu nokkrir einstaklingar, sem höfðu keypt bifreiðar af Procar með niðurfærða kílómetramæla, að leita réttar síns.
Ný bílasala
Eigendur Procar eru Gunnar Björn Gunnarsson og Haraldur Sveinn Gunnarsson. Þeir eru nú skráðir eigendur að bílasölu sem hefur hafið starfsemi í Akralind í Kópavogi, Carson ehf. Ekki þurftu þeir að leita langt eftir framkvæmdastjóra, en það er áðurnefndur Smári Heiðarsson. Hann er jafnframt sölustjóri og prókúruhafi hjá félaginu.
Samkvæmt fyrirtækjaskrá var fyrirtækið Carson ehf. stofnað á árinu 2013. Þá var tilgangur félagsins innflutningur, heildsala og smásala á hjólbörðum og varahlutum í bifreiðar. Carson ehf. hafði í upprunalegri mynd hætt starfsemi, en samkvæmt ársreikningi fyrir árið 2017 var starfsemin engin á því ári. Í september á þessu ári barst Fyrirtækjaskrá þó aukatilkynning og ný samþykkt fyrir félagið. Þá höfðu átt sér stað eigendaskipti og skipuð ný stjórn. Nýr tilgangur félagsins er kaup og sala bifreiða, rekstur fasteigna og lánastarfsemi.
Procar hélt leyfinu
Harðlega var gagnrýnt í júní að Samgöngustofa hafi ekki svipt Procar leyfi, þrátt fyrir að hafa blekkt viðskiptavini sína með breyttri kílómetrastöðu. Stóðu brotin yfir í minnst fimm ár. Héraðssaksóknari hefur nú málið til rannsóknar og þykir það mikið að umfangi. Í rökstuðningi Samgöngustofu fyrir ákvörðuninni er bent á greinarmun þess að leigja út bifreið og að selja þær. Samgöngustofa hafi ekki valdheimildir gagnvart bílasölu, en við bílasölu hafi brotin átt sér stað. Það sé því lögreglunnar að rannsaka.
Sjá einnig: Þetta er ástæðan fyrir því að Procar slapp með svindlið.
Hagnaður Procar var 200 milljónir á árunum 2015 og 2016 fyrir utan fjármagnsliði og rekstrartekjur 2,2 milljarðar árið 2016. Eignir leigunnar voru metnar á um milljarð í lok árs 2016 og nam þá eigið fé 23 milljónum.
Haraldur Sveinn og Fasteignafélag Austurlands
Annar eigenda Procar og Carson, Haraldur Sveinn, var einn stofnenda Fasteignafélags Austurlands ehf. Félagið fékk milljarð að láni frá Íbúðalánasjóði til uppbygginga á Austurlandi þrátt fyrir að eiginhlutafé félagsins væri langt undir því lágmarki sem reglur Íbúðalánasjóðs gerðu kröfu um. Þegar félagið var úrskurðað gjaldþrota árið 2011 sat Íbúðalánasjóður eftir með sárt ennið, 2,2 milljarða skuld og ósöluvænar íbúðir.
Sjá einnig: Sviðin jörð eiganda Procar: Fékk milljarða í lán frá Íbúðalánasjóði.
