Magnús Bjartur Solveigarson segir farir sínar ekki sléttar af sænskum veitingamanni sem hann segir vera fluttur til Íslands og ætli að opna hér veitingahús. Magnús hefur deilt frásögn sinni víða á samskiptamiðlum. Í samtali við DV segist hann vilja vara við manninum. Magnús segist hafa unnið fyrir Svíann í Noregi með skelfilegum afleiðingum.
„Ég trúi þessu ekki. Þessi maður er að flytja til Íslands og segist vera að opna veitingastað. Ef þið þekkið einhvern í veitingabransanum þá mæli ég með því að láta það vita af þessum. Hérna er sagan. Ég er í atvinnuleit í Bergen þegar ég fæ boð frá Tromsö um vinnu í eldhúsi. Þá var þessi maður að reka veitingastað þar. Mér var lofað góðum launum, góðum tímum og íbúð. Allt þetta myndi hann reyna að svíkja og hann komst upp með flest af því,“ segir Magnús.
Hann fullyrðir að eldshúsið hafi verið gífurlega illa rekið. „Aðkoman að eldhúsinu var hræðileg eins og sést á myndinni. Krosssmit á milli kjöts og sjávarfangs. Fiskurinn skilinn eftir í klaka sem lak út um allt. Hann drakk eins og brjálæðingur og öskraði mikið á fólk. Eins og má búast við þá fékk hann ekkert sérlega góðar einkunnir og þá byrjaði að fjúka rækilega í hann. Þá byrjaði hann að reka fólk m.a. mig í gegnum messenger á Facebook,“ segir Magnús.
Hann segist ekki enn hafa fengið öll laun sín. „Ég sagði honum að ég væri með samning og hann gæti ekki rekið mig án fyrirvara. Þá hótar hann að kalla á lögregluna til að henda mér út úr íbúðinni. Þrátt fyrir það að húsaskjól væri skriflegt í samningnum. Og honum væri sko alveg nákvæmlega sama hvort ég væri ekki með húsaskjól. Ég var nýfluttur í Tromsö að vetri til. ekki besti staðurinn til þess að hafa ekki neitt húsaskjól. Ég er ennþá að berjast við það að fá launin mín. Hann komst upp með þetta allt án nokkurs skaða. Ég endaði með því að þurfa að borga flutning o.fl. en fékk enginn laun,“ segir Magnús og heldur áfram.
„Þegar ég fór að kafa dýpra í málið þá komst ég að því að þetta er ekki í fyrsta skiptið sem hann hefur gert eitthvað svona. Hann hefur stungið af með peninga annarra áður og logið að þeim með að borga þeim til baka. Reykjavík þarf ekki annan svona fávita. Endilega deilið með þeim sem þurfa að vita þetta. Ég er ennþá að bíða eftir 400.000 krónum frá þessu öllu.“
