Árið var viðburðaríkt – ekki síst októbermánuður eins og við sjáum hér fyrir neðan.
Sjá einnig: Annáll janúar / Annáll febrúar / Annáll mars / Annáll apríl / Annáll maí / Annáll júní / Annáll júlí / Annáll ágúst / Annáll september
ViðskiptaMogginn greindi frá því í byrjun október að þeir aðilar sem hygðust hefja flugrekstur á Íslandi, WOW 2 og WAB, sem síðar fékk nafnið Play, ætluðu að opna bókunarkerfi sín þann 15. október. Upphafleg áætlun WOW gerði ráð fyrir að flug hæfust um miðjan október en því var frestað til desember. Play, þá WAB, áætlaði að hefja flug í lok nóvember á þessum tímapunkti. Flugsérfræðingar voru ekki sannfærðir, enda hræðilegur árstími til að hefja millilandaflug. WOW 2 er ekki enn farið á flug en búast má við því að flugfélagið verði komið í góðan gír þegar nálgast vorið. Markmið um að endurvekja starfsemi WOW eru enn í fullu gildi á þeim bænum. Hvað varðar Play þá er alls kostar óljóst hvenær flug hefst þar. Enn hefur ekki verið hægt að bóka einn einasta flugmiða.
Karlmaður fannst látinn í Salahverfi í Kópavogi í lok október. Samkvæmt heimildum DV virtist maðurinn hafa fallið til jarðar eftir að hafa verið að klifra utan á fjölbýlishúsi. Lögreglan varðist frétta af málinu en íbúum var brugðið.
Gísli Pálmi Sigurðsson, þekktur rappari, og vinkona hans, Ástrós Ósk Skaftadóttir, voru sökuð um innbrot og þjófnað á verðmætum í íbúðarhúsnæði í Árbæ í lok október. Kona sem tengist íbúum er urðu fyrir innbrotinu birti myndir af parinu á Facebook og staðhæfði að það hefði verið að verki. Gísli Pálmi tjáði sig um málið á Facebook: „BÍDDU VÁÁ! má maður bara ekkert lengur.. hahaha hva er að frétta.“ Málið fór sína leið hjá lögreglunni en ekki er ljóst hvort gefin hafi verið út ákæra.
Aðalmeðferð fór fram í máli Gyðu Drafnar Grétarsdóttur gegn Jóni Ársæli Þórðarsyni fjölmiðlamanni og RÚV. Málið varðaði umdeilt viðtal Jóns Ársæls við Gyðu í þáttunum Paradísarheimt. Í umdeilda þættinum ræddi Jón Ársæll við Gyðu Dröfn á meðan hún sat í afplánun inni á fangelsinu á Sogni. Ræddu þau meðal annars um erfið uppvaxtarár Gyðu og glímu hennar við fíkn. Snerist dómsmálið um það að Gyða hefði ekki fengið að gefa lokasamþykki fyrir þættinum eins og rætt var um við Jón Ársæl og RÚV. Svo fór að Gyða bar sigur úr býtum og fékk milljón króna í skaðabætur.
Hlynur Kristinn Rúnarsson, fíkill í bata og stofnandi samtakanna Það er von, var sakaður um að beita fyrrverandi maka sína ofbeldi í umfjöllun Stundarinnar. Hlynur svaraði ásökunum á þá leið að hann hefði verið í neyslu. Viðmælendur Stundarinnar voru ósammála og sögðu hann einnig ofbeldisfullan edrú. Þá voru fagaðilar ekki sáttir við að Hlynur héldi fyrirlestra í skólum um neyslu og edrúmennsku. Meintir þolendur Hlyns birtu eftirfarandi varúðarorð á samfélagsmiðlum: „Þessi maður er hrottalegur ofbeldismaður. Hlynur hefur beitt alla sína fyrrum maka lífshættulegu ofbeldi og ekki enn tekið ábyrgð á því eða reynt að biðja þolendur sínar fyrirgefningar þrátt fyrir að vera veitt skýr tækifæri til þess nú í edrúmennskunni. Hið gagnstæða hefur átt sér stað og ennþá í dag segir hann þær hafa látið sig gera það (beita þær ofbeldinu). Hann er enn þá hættulegur einstaklingur, veikur í hugsun og þarf að fyrirbyggja að hann komist eitthvað nálægt börnum í menntaskóla eða öðrum viðkvæmum hópum.“
Uppsagnir héldu áfram á Sýn og var íþróttafréttamaðurinn Hörður Magnússon látinn taka pokann sinn eftir tuttugu ára starf hjá fyrirtækinu. „Á 3 mínútna fundi var mér fyrirvaralaust sagt upp störfum eftir tæplega 20 ár,“ sagði hann, en uppsögn hans reitti marga til reiði.
Eigið fé úr sjóðum GAMMA þurrkaðist út á einu ári. Voru gulldrengirnir í GAMMA sakaðir um að fegra stöðu félagsins og rannsóknar á rekstri sjóðsins var krafist úr ýmsum áttum.
Femínistar brjáluðust yfir pistil Áslaugar Örnu Sigurbjörnsdóttur dómsmálaráðherra um eflingu á rannsókum kynferðisbrota og bætt viðmót við þolendur. Allt út af því að hún notaði orð sem þóknaðist ekki femínistum.
DV sagði einnig frá eltihrelli sem gekk laus á Akranesi. Alma Dögg Torfadóttir var ein af þeim sem stigu fram en maðurinn hefur áreitt hana í tæpan áratug. Það tók Ölmu fimm ár að fá lögregluna á Akranesi til að taka mark á henni en enn hefur ekki náð að stöðva manninn. „Ég er svo reið að þetta skuli viðgangast,“ sagði Alma meðal annars.
Facebook-síðan 9 to 5 Life deildi myndbandi frá Íslandi þar sem maður sést ganga berserksgang í einni af verslunum Hagkaupa. Búið er að horfa á myndbandið rúmlega sjö milljón sinnum.
Sagt var frá deilum Lindu Pétursdóttur, athafnakonu og fegurðardrottningar, við fyrrverandi leigjanda sinn. Deilurnar vörðuðu lengd uppsagnarfrests, ástand húsnæðis við skil og tryggingarfé. Linda lokaði á samskipti við leigjandann en hann sagði Lindu hafa hótað honum. Við nánari skoðun DV virtist leigusamningur hafa verið ógildur frá upphafi, því Linda er ekki eigandi hússins, heldur barnsfaðir hennar.
