Þingmaður Sjálfstæðisflokksins og fyrrverandi dómsmálaráðherra, Sigríður Á. Andersen, skýtur föstum skotum á samstarfsflokk sinn í ríkisstjórn og vinstrisinnaða umhverfisverndarsinna á vefsíðu sinni í dag:
„Vinstri menn vita ekki hvort þeir eru að koma eða fara í umhverfismálum. Nú vilja þeir banna það sem þeir skylduðu okkur til að gera fyrir örfáum árum.“
Málið snýst um þingsályktunartillögu sem tveir þingmenn VG standa að, ásamt þingmönnum úr Samfylkingu, Viðreisn og Pírötum, um að draga úr notkun pálmaolíu með banni, eigi síðar en á næsta ári. Pálmaolía er notuð til framleiðslu á lífdísli, sem notaður er sem eldsneytisgjafi fyrir bíla og lögum samkvæmt er henni er einnig blandað saman við hefðbundið eldsneyti til að draga úr mengun.
Sigríður segir þess tillögu vinstrimann koma á óvart:
„Því aðeins eru sex ár síðan ríkisstjórn vinstri flokkanna leiddi það í lög að allt eldsneyti skyldi blandað „endurnýjanlegu eldsneyti“ sem einkum er unnið úr pálmum og matjurtum á borð við repju, soja og maís. Tveimur árum áður hafði vinstri stjórnin lögfest stórkostlegar skattaívilnanir til örvunar innflutnings á slíku matjurtaeldsneyti. Þessi skylda og skattaívilnanir standa því miður enn og valda því að yfir milljarður króna rennur árlega úr ríkissjóði til erlendra framleiðenda á eldsneyti úr pálmaolíu, repju, hveiti, soja og maís,“
segir Sigríður.
Fjöldaframleiðsla á pálmaolíu er mest í Indónesíu og Malasíu, en þar eru skógar stráfelldir vegna aukinnar eftirspurnar og er olían sú ódýrasta sem fæst á markaði í dag. Framleiðslan er ekki sjálfbær og nemur eyðing regnskóga minnst 15 milljónum hektara fram að þessu, en það nemur um það bil einu og hálfu Íslandi.
Í greinargerð þingsályktunartillögunnar er einnig greint frá því að pálmaolíuframleiðslan hafi áhrif á loftslagsbreytingar og stuðli að útdauða órangútana:
„Regnskógar eru gríðarlega stórar kolefnisgeymslur og sumir regnskógar, einkum í Suðaustur-Asíu, vaxa í kolefnisríkum mýrum. Þegar skógarnir eru ruddir og brenndir aukast áhrif loftslagsbreytinga því bæði losnar kolefni út í andrúmsloftið þegar skógurinn sjálfur er brenndur og einnig þegar mýrin er ræst fram. Að auki kviknar oft í þessum mýrum og árið 2015, sem var mjög þurrt ár, var mikill hluti Suðaustur-Asíu hulinn menguðu mistri sem rekja mátti að miklu leyti til skógarelda í Indónesíu vegna pálmaolíuframleiðslu. Við það að breyta regnskógum í plantekrur eru í raun búin til nær líflaus landsvæði þar sem dýr eins og órangútanar eiga sér enga von. Talið er að ef haldið verður áfram að eyðileggja regnskóga Indónesíu á sama hraða gætu órangútanar orðið útdauðir í náttúrunni innan örfárra áratuga. Að auki hefur Amnesty International nýlega komið upp um hræðilegan aðbúnað fólks og barna sem vinnur á pálmaolíuplantekrum þar sem börnum er þrælað út og konur veikjast við að úða skordýraeitri á skógarbotninn.“
Sigríður spyr hvort ekki hafi verið ætlunin að draga úr útblæstri gróðurhúsalofttegunda með pálmaolíu á sínum tíma:
„Jú það var vissulega yfirvarpið hjá vinstri stjórninni á sínum tíma. Nú segja þingmenn vinstri flokkanna hins vegar um þetta eldsneyti:
„Reiknað hefur verið út að lífeldsneyti frá jurtaolíu, sem er um 70% af lífeldsneytismarkaði í Evrópu, losi 80% meira af gróðurhúsalofttegundum en jarðefnaeldsneytið sem verið er að skipta út. Pálmaolía trónir þar hæst og er þrisvar sinnum verri en jarðefnaeldsneyti, en næst á eftir kemur sojaolía sem er tvisvar sinnum verri.“
Ég hef af og til mælt gegn þessum fráleitu lögum og skattaílvilnunum vinstri stjórnarinnar og lagði fram frumvarp árið 2015 um að aflétta þessari íblöndunarskyldu til ársins 2020 svo menn fengju ráðrúm til að skoða málið ofan í kjölinn áður en svo miklum fjármunum væri kastað á glæ.
Nú hafa þingmenn Samfylkingar og VG sem sagt skoðað málið og komist að þeirri niðurstöðu að lög hreinu vinstri stjórnarinnar um endurnýjanlegt eldsneyti sem áttu að draga úr losun gróðurhúsalofttegunda hafi þvert á móti aukið losunina, valdið stórkostlegri loftmengun í Asíu, auk þess að stuðla að eyðingu regnskóga, ógna líffræðilegri fjölbreytni og ýta undir vinnuþrælkun og illa meðferð á konum og börnum.
