Lögreglan á Suðurnesjum svipti erlendan ökumann ökuréttindum til bráðabirgða eftir nokkuð óvenjulegt atvik á Reykjanesbraut í gær. Ökumenn leggja sig nú yfirleitt fram við það að vanda aksturslag sitt þegar þeir verða varir við lögreglubíl í umferðinni.
Lögreglumennirnir voru við umferðareftirlit á Reykjanesbraut í gær þegar bifreið var ekið með ofsahraða á eftir lögreglubílnum.
„Þegar saman dró töldu lögreglumenn að ökumaður bifreiðarinnar myndu aka aftan á lögreglubifreiðina og skiptu því um akrein. Var bifreiðinni þá ekið fram úr lögreglubifreiðinni og mældist hún á 150 kílómetra hraða. Auk ökumanns voru fullorðinn farþegi svo og 10 ára barn í bifreiðinni. Ökuskírteini ferðalangsins er í geymslu á lögreglustöð þar til að hann fer úr landi,“ segir í skeyti frá lögreglunni, en ekki kemur fram hvers vegna ökumaðurinn var að flýta sér jafn mikið og raun ber vitni.
Þá hefur lögregla kært á fjórða tug ökumanna fyrir of hraðan akstur á síðustu dögum. Einn þeirra ók yfir tvöföldum hámarkshraða því hann mældist á 61 kílómetra hraða þar sem hámarkshraði er 30 kílómetrar á klukkustund. Annar, sem ók Reykjanesbrautina, mældist á 145 kílómetra hraða þar sem hámarkshraði er 90 kílómetrar.
Fáein umferðaróhöpp hafa orðið í umdæminu á undanförnum dögum en þau voru öll minni háttar og engin slys á fólki.
