„Orkupakkinn er tímasprengja og getur verið banabiti ef ekki er farið 100% varlega varðandi réttindi Íslendinga á auðlindum landsins,“ segir Árni Johnsen, fyrrverandi þingmaður í aðsendri grein í Morgunblaðinu í dag.

Eins og kunnugt er fer fram atkvæðagreiðsla um þriðja orkupakkann á Alþingi í dag. Málið hefur verið fyrirferðarmikið í umræðunni undanfarna mánuði en í dag verður það til lykta leitt – í bili að minnsta kosti.

Í grein sinni varar Árni við því að orkupakkinn verði samþykktur.

„Fyrir nokkru var Timo Summa sendiherra Evrópubandalagsins í heimsókn í Vinnslustöðinni og var að skoða hin glæsilegu vinnsluhús fyrirtækisins. Þar hitti hann m.a. Binna forstjóra Vinnslustöðvarinnar og fleiri forráðamenn. Þeir spurðu sendiherrann hvers vegna ESB æskti svo mjög eftir inngöngu Íslands í ESB. Svarið var einfalt: Við teljum að allar þjóðir Evrópu eigi að vera í ESB og þið eruð Evrópuþjóð. Þið eruð tengsl okkar við norðurpólinn og íshafið, þið hafið fiskinn og orkuna og okkur vantar hvort tveggja. Það var einmitt það,“ segir hann.

Árni segir að flestir kunni að leggja saman tvo og tvo og engin ástæða sé til að treysta ESB sérstaklega.

„Þeir vilja fyrst og fremst gleypa okkur eins og lítinn gómsætan bita. Þegar Bretar dengdu á okkur hryðjuverkalögunum stóð ESB ekki með okkur eins og „samherjum“ bar og það heyrðist ekki múkk frá þeim. Þá flutti ég þingsályktunartillögu í Alþingi um 10 milljarða punda kröfu í skaðabætur frá Bretlandi vegna álitshnekkis Íslands en of margir íslenskir þingmenn þorðu ekki og ekki heyrðist mjálm frá ESB. Okkur liggur ekkert á að semja um orkuna, hún hleypur ekki. Tryggjum hana fyrir Ísland 1, 2 og 3. Látum ESB renna hjá.“