Talið er líklegt að plastglös í mismunandi litum sem er reglulega stillt upp á gatnamótum Bústaðavegar og Grensásvegar séu tengt fíkniefnasmygli. Hringbraut greinir frá þessu en samkvæmt heimildum fjölmiðilsins er líklegt að þetta séu skilaboð úr undirheimum Reykjavíkur. Nánar tiltekið þá ku glasið tákna að fíkniefni séu að finna á ákveðnum stað.
Vísir fjallaði um sambærilegt mál árið 2014 og þá var fullyrt að bollarnir væru skilaboð til tilvonandi fíkniefnakaupenda. Karl Steinar Valsson, yfirlögregluþjónn hjá miðlægri rannsóknardeild, segist í samtali við Hringbraut kannast við þá kenningu en segir lögreglu þó ekki hafa leyst gátuna. Hann útilokar ekki að ástæðan geti verið eitthvað sárasaklaust svo sem listagjörningur.
„Ég veit nú ekki í hvort þetta sé tengt því eða ekki, við getum ekki fullyrt um það. Þetta getur líka verið einhver að fíflast í ykkur og okkur, einhver listgjörningur. Það gæti alveg eins verið,“ segir Karl Steinar.
Líkt og fyrr segir þá telja heimildarmenn Hringbrautar að glasið sé skilaboð glæpasamtaka. Glasið geti til að mynda þýtt að stór sending af fíkniefnum væri komin til landsins. Litur glassins tákni að þau séu falin á samsvarandi stað. Til að mynda sé glasið blátt þá séu fíkniefnin í „bláu holunni“.
