Hinum þekkta og vinsæla fjölmiðlamanni Hjörvari Hafliðasyni var í dag sagt upp störfum hjá Sýn, fjölmiðlahluta Vodafone. Tólf öðrum starfsmönnum var sagt upp, þar af tveimur sjónvarpsfréttamönnum á Stöð 2. Hjörvar tjáði sig örstutt um brottreksturinn við DV og sagði:

„Það er eins og það er. Nú bæti ég í sóknina á Dr. Football hlaðvarpinu en það er miðill sem ég hef trú á.“

Um er að ræða mjög þekkt og umdeilt hlaðvarp um knattspyrnu og hafa yfirlýsingar úr þáttunum margoft ratað í fjölmiðla og þekktu fólki úr knattspyrnuheiminum og fjölmiðlaheiminum þar verið strokið öfugt. Hlaðvarpið hefur Hjörvar rekið sjálfur samhliða störfum sínum fyrir Sýn og sú spurning vaknar hvort verkefnið hafi verið þyrnir í augum forráðamanna Sýnar og átt þátt í uppsögninni:

„Ekki mér vitanlega,“ segir Hjörvar.

Hjörvar tjáir sig um brottreksturinn í Facebook-hópnum Brennslu-tips og segir þar:

„Þá er komið að endalokum eftir 4 góð ár í Brennslunni. Hafði illa gaman að þessu og sérstaklega samskiptunum við hina þræleðlilegu hlustendur okkar. Þarsíðasta sumar eignaðist ég nýtt barn í fjölmiðlum sem heitir Dr. Football og nú fer tíminn í að láta það verkefni halda áfram að vaxa. Ótrúleg vitleysa sem gekk á í þessi 4 ár en uppáhalds geðveikin mín var þessi fegurðarsamkeppni sem við stóðum fyrir í apríl. Takk fyrir mig og verið góð kútana mína.“