Stöðufærsla sem Friðjón nokkur skrifar innan Facebook-hópsins Bakland ferðaþjónustunnar hefur vakið gífurlega athygli undanfarna viku. Í færslunni lýsir Friðjón atviki þar sem kínverskir ferðamenn koma við sögu. Færslan hefur hlotið mörg hundruð læk og ríflega hundrað athugasemdir hafa verið skrifaðar. Á Twitter er færslan sem og þráðurinn sagður ógeðslegur því þar vaði uppi rasismi í garð Kínverja.
Sá mjög langan facebook status sem gerði ógeðslegt grín af Kínverjum með ógeðslegum stereótýpum, þessi status er með yfir 200 deilingar og öll kommentin eru um hvað þetta sé fyndin saga og bara aaaaaaaaaaaaaaaaaaaaaaaaaaaaaaaaa afhverju eru Íslendingar svona miklir fkn rasistar
— Sigrún Alua #BlueForSudan (@asgeirsd) July 25, 2019
Í færslunni lýsir Friðjón ferðamönnum sem komu að húsi hans á Norðurlandi. „Það er engu logið á ferðamennina okkar. Í gærkvöldi renndi bílaleigubíll í hlað hjá húsi okkar fjölskyldunnar norður í landi. Ökumaðurinn náði illa síðustu beygjunni á heimreiðinni og ók yfir nýsáða grasflöt og blómabeð húsfreyjunnar áður en honum tókst að stöðva við útidyrnar. Út úr bílnum komu fjórir Kínverjar, einn karlmaður og þrjár konur. Þau kváðust eiga pantaða gistingu hjá okkur og veifuðu bókunarpappír því til staðfestingar. Þau áttu reyndar bókaða gistingu hjá gistiþjónustu við Mývatn sem er í um 100 km fjarlægð frá okkar húsi en sá staður ber sama nafn og bærinn okkar,“ segir Friðjón.
Hann fullyrðir að konan hafi við þessar fréttir fretað í átt hans. „Misskilningur Kínverjanna var leiðréttur við töluverðar vonbrigðastunur þeirra og ein konan, sýnu elst í hópnum, gat ekki leynt gremju sinni. Hún byrgði andlitið í greipum sér, sneri umsvifalaust í okkur bakhlutanum og gaf frá sér ótrúlega hávaðasamt og langt fret svo jafnvel elstu menn í Þorlákshöfn muna ekki annað eins. Manni datt í hug uppblásin plastdúkka sem springur á ögurstundu. Eftir nokkurn æsing, handapat og nöldur eins og vankunnátta þeirra á GPS tækið í bílnum væri okkar sök skömmuðust þau upp í bílinn og óku af stað,“ segir Friðjón.
Sögunni er þó hvergi nærri lokið. „Ekki fóru þau langt heldur staðnæmdist bíllinn við hliðið á heimreiðinni og út skreiddist gamla finngálknið, dró niður um sig brækurnar og skeit á iðagræna og nýslegna grasflötina við heimreiðina. Svo rétti hún sig upp, klóraði upp um sig nærhöldin og skreiddist skjögrandi upp í bílinn eins og nýhreinsaður hundur. Reyndar verkaði hún sig ekki að erindi loknu og vorum við því laus við pappír í þokkabót við taðhrúguna. Svo ruddist bíllinn af stað og náði í það sinnið beygjunni inn á þjóðveginn. Sannkallað skítapakk. Ég saknaði þess mjög að hafa ekki tvíhleypuna mína við hendina til að leyfa kellingarandskotanum a.m.k. að heyra í henni sönginn. En fari ég einhvern tíma til Kínalands megið þið geta upp á því hvert verður mitt fyrsta verk við komuna þangað,“ lýsir Friðjón.
Athugasemdir við færsluna eru margar hverjar ansi grófar og eru Kínverjar kallaði „pakk“ og „villimenn“, svo nokkuð sé nefnt. „Hef unnið á veitingarstað þar sem þessir villimenn komu, aldrei séð eins ógeðslegt borðhald og illaliktandi fólk,“ skrifar til að mynda par með sameiginlegan Facebook-aðgang. Sumir segja að ummæli sumra um Kínverja jaðra við hatursorðræðu. „Það er ömurlegt að lesa kommentin hérna, þvílík fáfræði og sleggjudómar,“ segir einn maður.
