Jón Ingi Gíslason var í gær í Héraðsdómi Reykjavíkur dæmdur í tveggja mánaða skilorðsbundið fangelsi og til greiðslu sektar upp á 19.350.000 í ríkissjóðs vegna stórfellds skattalagabrots. Mál Jóns hefur verið afar lengi í meðferð í réttarkerfinu en sérstakur saksóknari ákærði hann vorið 2013 fyrir stórfelld skattalagabrot frá árinu 2009. Jóni var gefið að sök að hafa ekki talið fram til skatts fjármagnstekjur upp á yfir hundrað milljónir króna, eða 110.504.000, af uppgjöri á 44 framvirkum gjaldmiðlasamningum sem gerðir voru við Glitni banka og voru skattskyldar. Vangreiddur fjármagnstekjuskattur af þessum tekjum er rúmlega 11 milljónir króna.
Árið 2017 greindi DV frá því að Jóni hefði verið gert að víkja úr trúnaðarstörfum fyrir Framsóknarflokkinn og sem formaður kjördæmasambanda Reykjavíkur þar sem hann hefði brotið siðareglur flokksins vegna málsins. Jón var lengi áhrifamaður í Framsóknarflokknuim og talinn mikill kosningasmali. Er honum eignuð hlutdeild í miklum kosningasigri Framsóknarflokksins árið 2013. Einnig komst hann í fréttir fyrir að rækta bardagahana í Dóminíska lýðveldinu.
Fyrir dómi krafðist Jón þess að málinu yrði vísað frá dómi en þeirri kröfu var hafnað. Athygli vekur að hann hefur lengi mátt bíða dóms en ákært var fyrir rúmlega sex árum og afbrotið framið fyrir tíu árum. Hanaat er ólöglegt á Íslandi sem og í flestum vestrænum ríkjum en á sínum tíma vísaði Jón ásökunum um dýraníð á bug.
