Helga Áss Grétarssyni hefur verið sagt upp störfum sem dósent við Lagadeild Háskóla Íslands. Helgi Áss, sem er afar þekktur skákmaður, segir að uppsögnin muni hafa eftirmála. Í viðtali við Morgunblaðið segist hann telja að ekki hafi verið farið eftir málsmeðferðarreglum við þessa ákvörðun.
Ástæða uppsagnarinnar eru sögð vera sú að Helgi Áss hafi ekki uppfyllt þær skyldur sem kveðið er á um varðandi rannsóknir og ritrýnt efni, þ.e. að ekki hafi komið nægilega mikið efni frá honum. Helgi segist vera með lögmann í málinu og er ekki sáttur við uppsögnina. Telur hann mikinn vafa leika á því að hann hafi gerst brotlegur við þær reglur sem um þetta gilda. Hann skrifaði eftirfarandi Facebook-færslu um málið:
STARFSLOK
Fyrirsjáanlegt er að ég mun láta af störfum sem dósent við lagadeild Háskóla Íslands hinn 30. júní næstkomandi. Þessi starfslok eiga sér sinn aðdraganda og munu sjálfsagt eiga sín eftirmál. Síðar verður frekari ljósi varpað á þau málefni. Hins vegar á þessu stigi málsins vil ég þakka öllum sem ég hef átt samstarf við á vettvangi háskólasamfélagsins undanfarin 13 ár og sérstaklega er mér hlýtt til allra þeirra sem sinntu námi undir minni leiðsögn. Háskólakennsla getur verið gefandi starf og kennsluhættir í laganámi eiga að vera lifandi og fjölbreyttir. Vonandi eru sem flestir nemendur ánægðir með mig sem kennara. Ég hlakka til að nýta þá reynslu sem ég hef öðlast við Háskóla Íslands í þeim verkefnum sem ég hyggst taka að mér á næstu misserum.
