„Ég hef setið við hliðina á þessum manni og þetta er ekki maður sem þú vilt fá upp á móti þér,“ sagði Stefán Einar Stefánsson á kynningarfundi um splunkunýja bók sína: WOW – Ris og fall flugfélags, í Norræna húsinu í dag. Í spurningatíma eftir kynningu á bókinni var Stefán Einar spurður hvort annað flugfélag yrði stofnað á Íslandi. Stefáni þótti það ólíklegt vegna þess hve flugrekstur er erfiður og fjárhagur flugfélaga í dag, þar á meðal Icelandair, væri bágborinn. En hann sló því föstu að Skúli Mogensen myndi aldrei framar koma nálægt flugrekstri.
Ástæðan er sú að Skúli fékk rangan mann upp á móti sér, að sögn Stefáns. Sá maður heitir Steve Udvar-Házy og er forstjóri fyrirtækisins Air Lease Corporation. Á blaðsíðu 334 í bókinni segir um þetta:
„Það atriði sem réð þó mestu um að hann á ekki afturkvæmt á flugsviðið var leynisamkomulagið sem hann gerði við Isavia í byrjun októbermánaðar 2018. Eitt félag sat uppi með Svarta-Pétur, Air Lease Corporation. Forstjóri þess og stofnandi er einn áhrifamesti maðurinn í alþjóðlegum flugheimi. Hann tíundaði opinberlega að hann hefði aldrei fallist á þá ráðstöfun. Að fá Steve Udvar-Házy með þessum hætti á móti sér var í raun mun alvarlegra en að skilja eftir sig sviðna jörð vanskila og brostinna leiguskilmála. Fæstir flugvélaleigusalar snerta á þeim sem þannig hafa leikið goðsögnina ungversku sem raunar var helsti velgjörðarmaður Skúla á mesta uppbyggingarskeið félagsins.“
Samkomulag WOW air og Isavia sem hér er vísað til gerði Isavia kleift að kyrrsetja vélar WOW air vegna gífurlegrar skuldar (um 1 milljaður) WOW í lendingargjöldum. Isavia vildi ekki ganga að félaginu vegna þjóðarhagsmuna en samkomulag um möguleika til kyrrsetningar flugvéla var trygging fyrir Isavia vegna skuldanna. Um þetta segir á blaðsíðu 256:
„Gengið var frá samkomulaginu og frá því í byrjun október og þar til yfir lauk var alltaf að minnsta kosti ein vél WOW air til staðar á flugvellinum í Keflavík. Stóð WOW air í skilum samkvæmt greiðsluáætluninnni fram í febrúar 2019.“
Eins og flestir vita notaðist WOW air við leiguvélar en það láðist að greina eigendum vélanna frá þessu samkomulagi. Segir höfundur að þetta samkomulag hafi átt eftir að hafa ófyrirséðar afleiðingar fyrir íslenska flugþjónustu og vísar þar meðal annars til ofangreindra upplýsinga um Ungverjann áhrifamikla.
Menn telja sig hafa verið svikna
Skúli var á móti bókinni og neitaði samstarfi
