Nara Walker, sem hlaut 12 mánaða fangelsisdóm í Héraðsdómi Reykjavíkur í fyrra fyrir líkamsárás og stórfellt ofbeldisbrot í nánu sambandi, er laus úr fangelsi. Líkt og frægt er orðið beit Nara í tungu fyrrverandi eiginmanns síns þannig að hún fór í sundur.
Ástralski fjölmiðillinn ABC greinir frá þessu. Nara hefur ávallt haldið því fram að hún hafi verið verja sjálfa sig þegar hún beit tunguna af. Eiginmaður hennar hafi veist að henni í samkvæmi og kýlt hana margsinnis. Hann hafi svo haldið henni niðri og þegar hann hugðist kyssa hana hafi hún bitið tunguna af.
Nara lýsti þessu ítarlega í viðtali við DV í fyrra. „Hann þvingaði tungunni upp í mig og þetta voru ósjálfráð viðbrögð. Ég var í áfalli,“ sagði Nara þá. Hún sagðist gera ráð fyrir að meint lyfjabyrlun fyrr um kvöldið hafi spilað þar inn í. Hún kveðst á einhverjum tímapunkti hafa spýtt tungubitanum út úr sér á gólfið.
Í viðtali við ABC segist hún ekki hafa trúað því að þegar hún var handtekin. Hún er mjög gagnrýnin á íslenskt réttarkerfi en segir þó að henni sé hlýtt til Íslendinga. Málinu sé ekki alfarið lokið þar sem hún ætlar að berjast gegn brottvísun frá Íslandi, þar sem það gæti þýtt að hún fái ekki að koma inn á Schengen-svæðið aftur.
