Laugardaginn 11. maí stendur Kírópraktorstöð Reykjavíkur fyrir viðburði á frá klukkan 9 til 13 þar sem starfsmenn stöðvarinnar ætla að taka á móti fólki í meðferðir og mun allur ágóði renna til Fanneyjar Eiríksdóttur og Ragga, eiginmanns hennar.

Flestir Íslendingar ættu að vera stöðu þeirra hjóna kunnugir en Fanney hefur barist við krabbamein á fjórða stigi í langan tíma. Parið á saman tvö börn en það var á meðgöngu seinna barns þeirra sem krabbameinið fannst og þurfti að taka son þeirra með keisara löngu fyrir settan fæðingardag.

„Bæði Raggi og Fanney hafa verið í meðhöndlun hjá mér reglulega síðustu árin þannig að mér þykir afskaplega vænt um þau bæði og vil gera allt mitt til þess að geta hjálpað aðeins til,“ segir Guðmundur Birkir Pálmason kírópraktor sem stendur fyrir viðburðinum.

„Þetta fer þannig fram að allir eru velkomnir í tíma hjá okkur, hvort sem þeir eru kúnnar okkar eða í meðferð annars staðar. Þeim sem vilja bóka fastan tíma er velkomið að gera svo eða bara að mæta á staðinn. Við verðum aðallega fjórir kíróptaktorar sem vinnum hjá Kírópraktorstöð Reykjavíkur og svo verður Mark Kislich að nudda. Ég ákvað að bjóða öðrum kírópraktorum að vera með svo að fleiri kæmust að og til að ýta undir að kírópraktorar á Íslandi myndu standa saman fyrir gott málefni. Þeir sem vilja koma eru velkomnir til að nota stofuna okkar eins og hentar. Þetta verða hefðbundnar meðferðir og ef við þurfum að taka röntgenmyndir þá gerum við slíkt. Verðið verður eftir verðskrá en frjáls framlög eru velkomin og rennur allur ágóði að sjálfsögðu til Fanneyjar og fjölskyldu.“

Guðmundur skorar á sem flesta kírópraktora að koma og taka þátt og styðja þannig Fanneyju og fjölskyldu hennar í þeirri hetjulegu baráttu sem þau heyja.