Staðhæft hefur verið að Skúli Mogensen hafi byrjað undirbúning að stofnun nýs flugfélags aðeins nokkrum dögum eftir að WOW air fór í þrot. Núna er endurreisn WOW hafin með hlutafjármögnun á netinu. Á vefsíðunni hluthafi.com segir:

„Við erum fyrrum viðskiptavinir WOW Air og annarra flugfélaga. Við vitum að ef samkeppni minnkar eða fellur niður í samkeppnisumhverfi þá töpum við til lengri tíma. Auk þess vitum við að ferðaþjónusta á Íslandi hefur aukið hagvöxt og lífsgæði á undanförnum árum og viljum við tryggja þau gæði áfram.

Við teljum að ef Skúli og hans besta fólk getur endurreist WOW Air þá eigum við sem einstaklingar í þessu landi að sameinast um að hjálpa til. Því hvetjum við einstaklinga og fyrirtæki til að leggja fram lítilsháttar hlutafé í krafti fjöldans og tryggja rekstur WOW Air til framtíðar.“

Á síðunni eru leiðbeiningar um hvernig hægt er að taka þátt í fjármögnuninni og verða einn af eigendum nýs flugfélags. Komið hefur fram í fréttum að Skúli hefur átt í viðræðum við KEA um þátttöku í fjármögnun nýs flugfélags. Um hópinn sem stendur að baki fjármögninni segir á hluthafi.com:

„Við erum einstaklingar, sem sjá að rekstur lággjalda flugfélags í eigu íslendinga er raunhæfur kostur og viljum að landsmenn taki sig saman til að endurreisa WOW Air eða stofna nýtt lággjalda félag, sem er eitt brýnasta hagsmunamál þóðarinnar í dag.

​Þeir einstaklingar sem standa að gerð þessarar síðu og væntanlegs almenningshlutafélags hafa ekki starfað hjá WOW Air og eru ekki tengdir félaginu á nokkurn hátt.“