Í kjölfar gjaldþrots WOW air má búast við að 2.000 til 3.000 störf glatist. Þar af eru um 1.000 störf hjá WOW air. Síðan má gera ráð fyrir að starfsfólki hjá þjónustufyrirtækjum muni fækka þar sem færri ferðamenn munu koma til landsins. Einnig verða minni umsvif á Keflavíkurflugvelli enda var WOW air stór og umfangsmikill rekstraraðili á vellinum.

Morgunblaðið skýrir frá þessu í dag. Fram kemur að aldrei hafi fleiri misst vinnuna á einum degi hér á landi.

Blaðið segir að margra mánaða tilraunum stjórnenda WOW air til að bjarga fyrirtækinu hafi lokið í fyrrinótt þegar ALC, sem á sjö af þeim þotum sem WOW air var með í notkun, hafi látið kyrrsetja vélarnar í Bandaríkjunum og Kanada vegna skulda WOW air. Í framhaldi af því skilaði WOW air flugrekstrarleyfi sínu inn til Samgöngustofu og farið var fram á gjaldþrotaskipti félagsins hjá Héraðsdómi Reykjavíkur.

Mörg þúsund manns urðu strandaglópar hér á landi og erlendis við gjaldþrotið. Viðbragðsáætlun stjórnvalda var virkjuð til að reyna að draga úr því tjóni sem gjaldþrotið getur haft á orðspor Íslands sem áfangastaðar ferðamanna.