Þetta kemur fram í Fréttablaðinu í dag. Fram kemur að bóluefni gegn mislingum muni að öllum líkindum ekki klárast hér á landi áður en ný sending berst til landsins. Margir hringdu í Læknavaktina í gær og voru flestir að spyrjast fyrir og afla sér upplýsinga.
„Við erum að vakta nokkra tugi einstaklinga, bæði í höfuðborginni og á Austurlandi, sem talið er að geti hafa smitast af mislingum. Tíminn verður svo að leiða í ljós hvort einhverjir þeirra séu smitaðir.“
Hefur Fréttablaðið eftir Þórólfi.
Fram kemur að ekki sé auðvelt að finna út hvort fullorðið fólk er bólusett fyrir mislingum því rafræn skráning bólusetninga hófst ekki fyrr en fyrir nokkrum árum. Af þeim sökum þurfa fullorðnir að skoða bólusetningaskrá sína en hana er að finna hjá grunnskóla þeirra, heilsugæslustöðinni þeirra (þegar fólk var á barnsaldri) eða jafnvel hjá foreldrum. Fréttablaðið segir að samkvæmt upplýsingum frá Læknavaktinni þá sé óhætt að bólusetja fólk við mislingum ef vafi leiki á hvort það sé bólusett, jafnvel þótt það hafi verið bólusett áður.
