„Ég hef nú verið kallaður ýmislegt í kommentakerfunum og læt það ekki trufla mig. En í dag er ég sagður fera Zion-isti í kommentakerfi DV. Hvað er að vera Zion-isti?“ spyr Einar Bárðarson, undrandi yfir ummælum undir samantekt DV þar sem Einar Bárðarson og Laufey Helga Guðmundsdóttir sögðu álit sitt væntanlegum úrslitum í undankeppni Eurovision hér á landi. Einar Bárðar taldi að Friðrik Ómar væri eini keppandinn sem gæti ógnað Hatara. Ekki lýsti Einar yfir neinum pólitískum skoðunum í greininni. Hins vegar eru margir andvígir því að keppnin sé haldin í Ísrael vegna framferðis Ísraelsmanna gegn Palestínumönnum. Í þeim anda skrifar Róbert Logi Benediktsson undir fréttina:

„Einar og Laufey eru greinilega Zionistar.“

Yfir þessu klórar Einar sér í kollinum en FB-vinir hans takast á um skilgreiningu á orðinu Zionisti. Björn Ingi Hrafnsson, ritstjóri Viljans, skrifar:

„Vinur Ísraels, amk ekki hatursmaður þess. Ég er kallaður þetta líka. Velkominn í klúbbinn.“

Söngvaskáldið góðkunna, Svavar Knútur leggur einnig orð í belg:

„Ég myndi nú ekki segja að Zionisti þýði vinur Ísraels. Vinir eru þeir sem til vamms segja. Þetta orð vísar til þeirra sem styðja við þá stefnu að Ísrael sé útvaldið land fyrir gyðinga eingöngu og þeir séu í fullum rétti að tortíma Palestínu-Aröbum. Í breiðara samhengi og rasískara vísar þetta til einhvers ímyndaðs alheimsgyðingasamsæris. Fyrri merkingin er raunhæfari og á sér notagildi, rétt eins og Islamisti og Nasisti eiga við um viðlíka stefnur á grundvelli Islam og Hvítrar þjóðernishyggju. 
Skýring Björns Inga er því miður mjög tæp. Að því sögðu, þá held ég að þú sért eins fjarri því að vera Zionisti eins og hægt er að hugsa sér elsku Einar“

Sem nærri má geta er Björn Ingi ekki sammála Svavari Knúti en sá síðarnefndi telur uppnefnið á Einari Bárðarsyni vera ómaklegt.