Guðmundur Ingi Þóroddsson, formaður Afstöðu, félags fanga á Íslandi, segir að Nara Walker þyrfti að annað hvort að vera á grafarbakkanum eða í réttum stjórnmálaflokki til að fá náðun. Nara var í fyrra dæmd í fangelsi fyrir að bíta tungu þáverandi eiginmanns síns í sundur. Nara sagði í fyrra sögu sína í viðtali við DV.

Aðstandendur hennar hafa komið af stað undirskriftarsöfnun þar sem biðlað er til forseta Íslands að náða hana þar sem Nara var að þeirra sögn að verjast heimilisofbeldi. Guðmundur Ingi, sem þekkir vel til fangelsiskerfisins á Íslandi, segir á Facebook að þetta sé því miður vonlaust.

„Því miður búum við ekki við slíkt kerfi að Guðni geti einn og sér náðað fólk. Til þess að fá náðun þarf fyrst að sækja um slíkt hjá náðunarnefnd Dómsmálaráðuneytisins sem tekur umsóknina til athugunar. Ef svo ólíklega vill til að nefndin telur að náða eigi manneskjuna þá er það dómsmálaráðherra sem ákveður hvort hann muni náða eða ekki. Ef ráðherra vill náða þá mun hann senda náðunina tilbúna til forseta til þess aðeins að staðfesta hana. Það er því aldrei hlutverk forseta að náða, aðeins að staðfesta hana,“ segir Guðmundur Ingi.

Hann bætir því við að raunar sé fólk einungis náðað á Íslandi í tveimur tilvikum. „Undanfarna áratugi, þá eru menn ekki náðaðir nema að þeir liggi fyrir dauðanum sjálfir eða maki umsækjanda. Þó eru undantekningar eins og t.d ef umsækjandi sé í réttum flokki og á leið á alþingi. Náðunarnefndin er skipuð 3 aðilum, 2 lögfræðingum og einum lækni sem sýnir vel hvernig áherslunnar eru þar. Aldrei er náðað fyrir það sem einstaklingar gera gott eða fyrir eitthvað jákvætt. Þú þarft að liggja fyrir dauðanum eða vera mjög veikur til að fá náðun. Ef þessi kona fengi náðun, sem ég myndi sjálfur óska að hún fengi, þá væri eitthvað mikið að og ljóst að um geðþótta ákvörðun er um að ræða,“ segir Guðmundur Ingi.