Hljómsveitin Hatari hefur gefið út alþjóðlega fréttatilkynningu á ensku þar sem því er haldið fram að Margrét Friðriksdóttir hafi verið ráðin kynningarfulltrúi hljómsveitarinnar. Margrét, sem er sannkristin, heldur úti hinum stóra Facebook-hópi Stjórnmálaspjallið. Margrét er mikill stuðningsmaður Ísraelsríkis. Hún hefur tjáð sig með mjög ákveðnum og kraftmiklum hætti um framlag Hatara til undankeppni Eurovision, Hatrið mun sigra, og segist ætla að flytjast af landi brott ef lagið verður valið sem framlag Íslands til Eurovision.
Í fréttatilkynningunni er sagt að Margrét hafi undirritað starfssamning sinn við fyrirtækið Svikamylla ehf, sem sé alþjóðlegur dreifingaraðili fyrir hljómsveitina. Í tilkynningunni er látið í veðri vaka að hótun Margrétar um að flytjast af landi brott ef framlag Hatara verður valið til þátttöku í Eurovision sé frábær fjölmiðlabrella. Sagt er að orðspor Margrétar henti fullkomlega til að skapa glundroða á meðal íhaldsfólks og vekja andstæðingum Hatara ótta.
