Slagsmál brutust út á milli tveggja karlmanna í miðbæ Þórshafnar í Færeyjum aðfaranótt föstudags. Í kjölfarið var annar mannanna handtekinn fyrir líkamsárás.

Samkvæmt öruggum heimildum DV eru gerandinn og fórnarlambið Íslendingar og starfar gerandinn sem lögreglumaður hér á landi.

Færeysku fréttamiðlarnir Dagur og In greina frá málinu.

Fram kemur að um þrjú leytið aðfaranótt föstudags hafi tilkynning borist til lögreglu um slagsmál milli tveggja karlmanna í miðbæ Þórshafnar. Endaði það með því að annar þeirra sló hinn. Fram kemur að fórnarlamb árásarinnar hafi hlotið áverka og verið fluttur til aðhlynningar og árásarmaðurinn hafi verið handtekinn. Fram kemur að lögreglan hafi viljað tryggja að árásarmaðurinn myndi ekki flýja land fyrr en búið væri að afgreiða málið.

Þá kemur fram að málið sé enn í rannsókn.

Í samtali við DV staðfesti fulltrúi lögreglunnar í Þórhöfn að hinn handtekni væri „útlendingur“ og búið væri að úrskurða í máli hans. Að öðru leyti gat hann ekki tjáð sig nánar um málið.