Jón Baldvin Hannibalsson, fyrrum utanríkisráðherra og formaður Alþýðuflokksins, hefur verið í sviðsljósi umræðunnar vegna ásakana um kynferðisbrot. Jón Baldvin hefur komið fram í fjölmiðlum og vísað þessum ásökunum á bug. Eiginkona hans, Bryndís Schram, steig í morgun fram á ritvöllinn til varnar eiginmanni sínum. Skrifaði hún grein í Fréttablaðið í dag þar sem hún fjallar um málið. Í greininni dásamar hún Jón Baldvin og vísar öllum ásökunum á hendur honum á bug.
Kvikmyndagerðarkonan Elísabet Ronaldsdóttir fjallar um greinina og segir að hún og Bryndís eigi sér sögu. Elísabet segir:
„Hún gerist kvöldið þegar hún ákvað að hringja í mig og lýsa því yfir hvað dóttir hennar væri mikill geðsjúklingur. Þegar ég var ekki til í að samþykkja það sí svona, jós hún yfir mig ógeði um ábyrgð barns sem hljóp um nakið og nuddaðist upp við föður sinn, hreinlega með hann á heilanum.“
Elísabet bætir við: „Allt þetta af því hún vissi að ég hefði lesið handrit sem dóttir hennar skrifaði og fjallar um uppgjör dóttur við föður og móður eftir áralanga vanrækslu og misnotkun.“
Elísabet segir að hún hafi aldrei beðið um þetta símtal.
„En eftir það stóð ég uppi þess fullviss að þau hjónin hefðu ljótt að fela. Ég stend með Aldísi og Guðrúnu og öllum þeim konum sem hafa stigið fram og hvika ekki þó Bryndís kalli mig lygara og ljóta.“
