Logi Einarsson, formaður Samfylkingarinnar, virðist setja spurningarmerki við það hversu góð hugmynd það sé koma fyrir tveimur pálmatrjám í Vogabyggð. Í lokum hópi Samfylkingarfólks á Facebook segir hann að þó hugmyndin sé skemmtileg þá sé ýmsu að hyggja.

„Hugmyndin að pálmatrjánum er á margan hátt skemmtileg og í sjálfu sér finnst mér fjármagn í listaverk almennt vera góð fjárfesting. Í þessu tilfelli er þó að ýmsu að hyggja sem ég vona að listakonan og dómnefnd hafi leitt hugann að,“ segir Logi.

Hann segir að það sé helst tvennt sem þurfi að skoða. „Í fyrsta lagi verður svona hátt mannvirki eins og sýnt er auðvitað aldrei eingöngu úr gleri. Það þarf gríðarlegt burðarvirki, líklegast úr stáli, sem breytir hugmyndinni eins og hún er sett fram mjög mikið. Þá getur slíkt mannvirki auðveldlega safnað raka og óhreinindum að innan, sem erfitt er að fást við og gera þá hlutinn minna spennandi,“ segir Logi.

Hann segir enn fremur að birta geti haft neikvæð áhrif. „Í öðru lagi er eins víst og þetta verður spennandi í myrkri gætu áhrifin orðið mikið síðri í dagsbirtu, þegar glerið endurkastar birtunni. Gler ber nefnilega einkenni steins og er langt því frá með jafn létt yfirbragð og margir freistast til að álykta,“ segir Logi.

Hann segir að lokum að þetta megi leysa, meðal annars með peningum, en kostnaðurinn við verkið, 140 milljónir, hefur verið einna helst gagnrýndur. „Allt er þetta þó leysanlegt með kunnáttu, útsjónasemi og peningum og ég kýs því að taka afstöðu til verksins þegar ég sé endanlega útfærslu. En ég er viss um að það muni leysast farsællega og þetta verk muni vera til prýði í borgarinhverfinu,“ segir Logi.