Sigríður Bryndís Baldvinsdóttir er tveggja barna móðir sem er búsett í Reykjavík. Sigríður er þjóðernissinni og kippir sér ekki upp við það ef hún er kölluð nasisti eða rasisti. „Við erum þjóðernissinnar og vitum það. Hvað aðrir segja er þeirra vandamál.“

Rætt verður við Sigríði í þættinum Paradísarheimt með Jóni Ársæli á RÚV á sunnudagskvöld. Stutt sýnishorn úr þættinum birtist á vef RÚV í dag en þátturinn verður sýndur klukkan 20.35 á sunnudag.

„Þeir geta alveg verið fínir ef þeir aðlagast og koma ekki til að breyta Íslandi í eitthvert Arabaríki,“ segir Sigríður um afstöðu sína til innflytjenda. Henni er umhugað að Íslendingar varðveiti þjóðerni sitt, menningu og tungu.

Á vef RÚV kemur fram að Sigríður sé með húðflúr á hálsinum þar sem stendur C18. Talan 18 stendur fyrir upphafsstafi Adolfs Hitlers; A er fyrsti stafurinn í latneska stafrófinu og H sá áttundi. C18 (Combat 18) er einnig nafn á hryðjuverkasamtökum nýnasista. Samtökin voru stofnuð í Bretlandi árið 1992 en eru með starfsemi í mun fleiri löndum.

Þá segir Sigríður í þættinum að hún dragi í efa að helför nasista hafi verið jafn víðfeðm og fullyrt hefur verið. Eins og flestir vita er helförin hugtak sem notað er til að lýsa skipulögðum fjöldamorðum nasista á evrópskum gyðingum í síðari heimsstyrjöldinni. Um sex milljónir gyðinga voru drepnir í styrjöldinni og voru drápin liður í áætlun Adolfs Hitlers um að útrýma gyðingum.

Þó að Sigríður dragi í efa umfang helfararinnar harmar hún hvernig fór. Þegar Jón Ársæll spyr hana hvort hún sé á móti nasismanum segir hún: „Alls ekki sko, ekkert frekar en kommúnismanum. Þetta er bara pólitík þess tíma.“

Þegar Jón Ársæll bendir á að nasisminn lifi – sé nú kallaður nýnasismi – segir hún: „Já, ég hef nú talað við ansi mikið af þessu fólki og þetta eru bara venjulegir þjóðernissinnar. Ef maður þarf að vera nasisti af því maður er þjóðernissinni, þá bara erum við það. Það snertir okkur ekki að vera kölluð nasistar eða rasistar. Við erum þjóðernissinnar og vitum það. Hvað aðrir segja er þeirra vandamál.“

Tekið er fram í lok fréttarinnar að sjónarmiðin sem koma fram í þættinum á sunnudag séu alfarið sjónarmið viðmælanda og endurspegla ekki með neinum hætti sjónarmið eða viðhorf þáttastjórnanda eða RÚV. Þátturinn er sem fyrr segir á dagskrá á sunnudag klukkan 20.35.