Til greina kemur að þau fjögur stéttarfélög sem hafa vísað deilu sinni við Samtök atvinnulífsins (SA) til ríkissáttasemjara slíti viðræðum við SA ef enginn árangur næst á næsta samningafundi.

„Það hljóta allir að gera sér grein fyrir því að ef ekkert þokast í viðræðunum þá verðum við að gera eitthvað til að ýta þeim áfram.“

Hefur Fréttablaðið eftir Ragnari Þór Ingólfssyni, formanni VR, um stöðuna í viðræðunum. Hann segir lítinn tilgang að standa í viðræðum, sem hreyfast ekki áfram, á meðan launþegar tapi en hann segir launþega verða af þremur til fjórum milljörðum á mánuði miðað við kröfugerð verkalýðsfélaganna. Ef niðurstaðan eftir næsta fund verður sú að lítið hafi miðað í samkomulagsátt munu félögin skoða það alvarlega að slíta viðræðunum.

Fréttablaðið hefur eftir Ragnari að það liggi í hlutarins eðli að lagt verði upp með aðgerðaráætlun um hvernig sé hægt að þrýsta á að „kröfum um mannsæmandi lífskjör verði mætt“.

Aðspurður sagði Ragnar að ekkert hafi upp á sig að standa í viðræðum sem þokast ekkert áfram, það sé mikilvægt að koma hreyfingu á þær.

„Það eru engin átök í kortunum nema félagsmenn ákveði og samþykki að fara í slíkt. Það er ekki ákvörðun formanna eða samninganefnda. Við vinnum eftir kröfum sem félagsmenn samþykktu en enn sem komið er höfum við ekki fengið sýnileg viðbrögð. Það er til lítils að standa í einhverri störukeppni.“

Hefur Fréttablaðið eftir honum.