Ástrós Birta Birgisdóttir, 13 ára, var að passa í Sævarlandi í Fossvogi fyrr í dag, þegar vespu í hennar eigu var stolið, einhvern tíma á milli kl. 12 og 14. Eins og það væri ekki nógu slæmt, þá er enn verra að þetta er í þriðja sinn sem vespu í eigu fjölskyldunnar er stolið.
Vespu bróður hennar, Brynjars Karl Birgissonar var stolið í tvígang á hálfu ári og segir faðir þeirra, Birgir Örn Tryggvason, að það sé erfitt að útskýra fyrir börnunum af hverju verið sé að stela eigum þeirra af þeim.
„Við sitjum bara hérna ráðþrota,“ segir Birgir Örn.
Bæði börnin fengu vespurnar í fermingargjöf, vespu Brynjars Karls var stolið stuttu eftir fermingu, og aftur um hálfu ári seinna þegar hann var á æfingu í Þrótti. Ástrós Birta fékk sína vespu einnig í fermingargjöf og núna nokkrum mánuðum seinna er henni stolið. Brynjar karl er einhverfur og segir faðir hans að vespunni hafi verið stolið af unglingsdrengjum í bæði skiptin, ekki þeim sömu, en drengirnir tengist.
Öll málin eru hjá lögreglu, en telur Birgir Örn að það sé ekki tenging á milli þjófnaðarins í dag og þeirra fyrri. „Það væri ótrúleg tilviljun.“
Birgir er ekki alveg viss hvernig tryggingamálum er háttað og hvort að fjölskyldan er tryggð fyrir þjófnaðinum. „En þegar ég hringi í lögregluna og tilkynni, þá fæ ég svarið: „Já komdu bara niður eftir, þú ert sá fjórði í dag.“
Þetta virðist vera daglegt drauð hjá þessum krökkum. Ég veit ekki hvað þetta er, þetta er tekið til að taka það og skemmt, ekki til að nota.
Við höfum ekki hugmynd hver var að verki, ég vonast bara til að einhver sé með öryggismyndavélar,“ segir Birgir Örn. „Vespan var stýrislæst og dóttirin með lykilinn. Vespuna þarf að mölva upp með átaki og koma henni í burtu þannig að það var enginn einn að þessu. Í tilviki vespu sonarins var stýrið brotið og hún tengd og keyrt í burtu á einhverjum þremur mínútum.
Skilaboðum hefur rignt yfir Birgi Örn á Facebook eftir að hann póstaði færslu þar um þjófnaðinn. „Maður er pínu brotinn og þreyttur, en þakklátur fyrir alla hjálp.“
