Samkvæmt könnun meðal ljósmæðra telur meirihluti þeirra grunnlaun upp á 671 þúsund krónur vera eðlileg laun. Raunin er sú að grunnlaunin eru 461 þúsund en geta mest orðið 611 þúsund undir lok starfsævinnar, hafi viðkomandi lokið öllum námsskeiðum.
Á annan tug uppsagna ljósmæðra tóku gildi á sunnudag, en alls hafa 23 ljósmæður sagt upp störfum hjá LSH. Hinar uppsagnirnar taka gildi í október. Á laugardag birtu þær ljósmæður sem luku störfum sínum þann dag myndir og skilaboð á Facebooksíðum sínum. Myndirnar voru allar samsvarandi: vinnuskór þeirra og starfsmannaskírteini á LSH, auk skilaboðanna „Ljósmóðir leggur skóna á hilluna.“
Ein þeirra var Signý Scheving Þórarinsdóttir, sem vann á meðgöngu- og sængurlegudeild, en í dag birti hún mynd af launaseðli sínum á Facebook. Signý er 34 ára, hefur verið ljósmóðir í 3 ár og hjúkrunarfræðingur í 7 ár. Launaseðillinn sem er frá 1. apríl síðastliðnum sýnir laun hennar fyrir 70% starf á þrískiptum vöktum (morgun-, kvöld- og næturvaktir). Signý vann þriðju hverja helgi, en eins og áður sagði er hún ein þeirra ljósmæðra sem lauk störfum 1. júlí.
Í samtali við DV segir Signý launin síðan hafa hækkað í 484 þúsund. „Ég fékk afturvirka hækkun frá áramótum. En þessi hækkun er mjög lítil, 24 þúsund á mánuði. Við hækkum mjög hægt í launum.“
Aðspurð um af hverju hún hafi verið í 70% starfi svarar Signý;, Já, ef við vinnum meira en 80% á þrískiptum vöktum, er hvíldarákvæðið brotið. Fólk er mjög fljótt að brenna út í 100% vaktavinnu. Ég vinn 70% vinnu, því ég á þrjú börn og þar af eitt árs gamalt og mér finnst ég alveg vera nógu mörg kvöld og nætur í burtu frá þeim.“
Síðasta samningafundi ljósmæðra við samninganefnd ríkisins lauk rétt eftir hádegi síðastliðinn fimmtudag. Engin sátt náðist á þeim fundi og hefur næsti fundur verið boðaður á fimmtudag, 5. júlí næstkomandi.
Yfirvinnubann ljósmæðra hefst um miðjan júlí, en bannið var samþykkt á fundi ljósmæðra með 90% atkvæða.
