Einar Sveinbjörnsson veðurfræðingur er í raun hálf orðlaus yfir veðrinu sem verið hefur á Suður- og Vesturlandi í sumar. Aðeins fimm dagar af síðustu sextíu og tveimur hafa verið alþurrir í Reykjavík, eða um 8 prósent. Einar segir að eitthvað skrýtið sé í gangi.

„Það eru einhverjir skrýtnir hlutir í gangi sem ekki verða skýrðir einn, tveir og þrír, hvað sem síðar verður,“ segir Einar í samtali við RÚV. Hann bendir á að háloftavindar og háloftastraumar hafi verið afbrigðilegir í sumar. Þetta hafi leitt til þess að suðvestanátt hefur verið ríkjandi sem hefur borið lægðir að landinu.

„Mig grunar að öll þessi megin hringrás á norðurhveli jarðar sé ekki og hafi ekki almennilega verið í fasa,“ segir Einar og bætir við það sé engum vafa undiropið að þessi frávik séu það stór að þau séu mjög óvenjuleg.

„Sérstaklega þegar horft er á þessa tvo mánuði eða tímabil sem hefst 30. apríl. Þetta er svo sérstakt vegna þess að oft höfum við tengt sjávarkulda hér vestur af við bráðnandi hafís og kulda sem kemur úr norðri, en nú kemur hann úr vestri.“

Einar sagði í færslu á Facebook-síðu sinni í morgun að samanlögð úrkoma í Reykjavík í maí og júní hefði verið gríðarlega mikil, eða 243 millímetrar.

„Við verðum að hafa í huga að alla jafna eru þetta þurrustu mánuðir ársins, í það minnsta maí. Hæstu sambærilegu gildi sem ég finn í úrkomugagnaröðum Reykjavíkur allt frá 1920 eru annars vegar 167 mm frá 1970 og 166 mm frá 1989. Þarna munar mjög miklu og rigningin þetta vorið er mjög afgerandi í Reykjavík í sögulegu mælingasamhengi.“