Sekúndan í auglýsingatímanum í kringum leiki Íslands á heimsmeistaramótinu í fótbolta er að nafnvirði sú dýrasta sem boðið hefur verið upp á í sögu Rúv. Þetta segir Einar Logi Vignisson, auglýsingastjóri RÚV, í samtali við Morgunblaðið.
Sekúndan er seld á 18 þúsund krónur en til samanburðar hefur RÚV selt sekúnduna á 15 til 16 þúsund í auglýsingahléum fyrir viðburði eins og Áramótaskaupið og Eurovision. Þetta þýðir að hver birting á 100 sekúndna auglýsingu í hálfleik kostar 1,8 milljónir króna.
Einar segir að auglýsingatímarnir í hálfleik í leikjum Íslands á mótinu séu löngu uppseldir. Enn sé þó hægt að kaupa sekúndur í kringum leikina. Þá segir Einar að óvenju mikið sé um að auglýsendur frumgeri sjónvarpsauglýsingar fyrir mótið.
„Það sem er áhugavert fyrir þetta mót núna er að það hafa aldrei jafn margir aðilar frumgert langar sjónvarpsauglýsingar fyrir nokkurn sjónvarpsviðburð,“ segir Einar í samtali við Morgunblaðið.
