Það getur ýmislegt gerst á einum degi. Þann 28. apríl ætlaði Ping Kuen Shum, íbúi í Vancouver í Kanada, að fagna afmælisdegi sínum og jafnframt sínum síðasta vinnudegi fyrir eftirlaun.
Áður en hann mætti til vinnu ákvað hann að versla sér lottómiða þegar hann staldraði við í verslun. Þetta voru skyndikaup til þess að fagna lokadeginum sem vinnandi maður.
Ping bjóst ekki við því að stóri dagurinn hans yrði bráðum miklu stærri og ógleymanlegri en hann gerði upphaflega ráð fyrir. Seinnipart dagsins var dregið úr lottótölunum og gerðist maðurinn svo heppinn að vera með allar sex vinningstölurnar réttar. Þá hlaut hann tvær milljónir í kanadískum dollurum eða eina og hálfa milljón í bandaríkjadölum – sem samsvara 154 milljónum íslenskra króna.
Talið er að líkurnar á því að ná öllum tölum réttum í þessu tiltekna lottói séu tæpar fjórtán milljónir á móti einum.
Í yfirlýsingu frá Ping sagðist hann ætla að nota stóra vinninginn og halda í frí til Kína með fjölskyldu sinni.
Happatölur Ping voru 9, 12, 13, 18, 21 og 29.
