Að minnsta kosti ekki ef mark má umfjöllun í nýjasta tölublaði vikuritsins Her&Nu. Þar er mynd af kaldri drottningunni á forsíðunni með textanum:
„Læknir varar við. Margrét frosin á Íslandi. Ísköld og afskipt.“
Inni í blaðinu er síðan ein opna lögð undir myndir og umfjöllun um Íslandsheimsókn drottningarinnar. Þar segir meðal annars að vel hafi legið á Margréti í upphafi heimsóknarinnar en hún hafi síðan fengið að kenna á íslensku veðurfari við hátíðarhöldin í Lækjargötu. Það hafi verið köld „ánægja“ fyrir drottninguna að sitja fyrir utan Stjórnarráðið í þá hálfu klukkustund sem dagskráin stóð þar yfir. Hún hafi fengið teppi og forseti Íslands hafi boðið henni húfu en það hafi drottningin afþakkað kurteislega.
Þá er rætt við Jerk W. Langer, lækni, um þetta og haft eftir honum að það sé ekki hættulaust fyrir fólk á þessum aldri (drottningin er 78 ára) að vera í svona kulda lengi. Hjartað eigi erfiðara með að ráða við aðstæður sem þessar en hjá yngra fólki. Ef fólk sé veikt fyrir geti liðið yfir það.
Þá er því lýst að drottningin hafi reynt að pakka sér enn betur inn í teppið og hafi þurft að snýta sér og halda fyrir eyrum á köflum því henni var svo kalt. Ekki er sagt berum orðum að veðurfarið hafi verið Íslendingum að kenna en með góðum vilja má lesa það út úr umfjölluninni.
„Að taka um eyrun er dæmigert merki um að fólk er að verða kalt. Einn af fyrstu stöðunum sem kólnar er eyrun. Þegar maður kólnar aukast líkurnar á að fá sýkingar. Það getur verið kvef, eyrnabólga eða í versta falli lungnabólga.“
Er haft eftir Langer sem virðist hafa áhyggjur af heilsu Margrétar eins og blaðamenn Her&Nu sem fagna því að á endanum að aðrir hlutar hátíðarhaldanna hafi farið fram innanhúss.
