Í nóvember voru uppgreiðslur verðtryggðra húsnæðislána hærri en nýjar lántökur. Þetta er í fyrsta sinn frá 2015 sem þetta gerist. Verðtryggð lán banka til heimila, með veði í húsnæði, drógust saman um tæpan milljarð í nóvember. Þetta kemur fram í nýjum tölum frá Seðlabankanum sem byggja á upplýsingum frá viðskiptabönkunum.

Morgunblaðið skýrir frá þessu í dag. Í nóvember lánuðu bankarnir heimilunum, með veði í íbúðarhúsnæði, 14,3 milljarða þegar tillit hefur verið tekið til uppgreiðslna. Aldrei fyrr hafa bankarnir lánað jafnmikið í formi óverðtryggðra lána til heimilanna í einum mánuði.

Í október og nóvember lánuðu bankarnir heimilunum tæplega 24 milljarða í óverðtryggðum lánum en það er álíka há upphæð og þeir lánuðu allt árið í fyrra.