Óvissa virðist ríkja um framtíð bakarískeðjunnar Kornsins. Starfsmenn minnst eins útibús keðjunnar hafa fengið upplýsingar um að búið sé að loka útibúinu og ekki standi til að opna það aftur. Er það útibú Kornsins að Fitjum í Reykjanesbæ. Þá hefur DV upplýsingar um að öllum útibúunum, tólf talsins, verði lokað en tekið skal fram að ekki hefur náðst í forsvarsmenn keðjunnar til að fá þetta staðfest.
Útibú Kornsins eru tólf á höfuðborgarsvæðinu og er eitt til staðar í Njarðvík en hjá fyrirtækinu starfa hátt í 90 starfsmenn. Í haust lét Helga Kristín Jóhannsdóttir, þáverandi framkvæmdastjóri Kornsins, loka þremur útibúum sökum fjárhagslegrar endurskipulagningar. Útibúin voru í Garðabæ, Breiðholti og við Lækjargötu.
DV náði sambandi við Helgu Kristínu og sagðist hún ekki lengur vera framkvæmdastjóri fyrirtækisins. Vildi hún ekki svara neinum spurningum og gaf ekki upplýsingar um hver væri núverandi framkvæmdastjóri.
„Ég þarf að kanna minn rétt“
Þá hafði DV samband við Karen Ósk Árnadóttur, starfsmann Kornsins að Fitjum í Reykjanesbæ. Karen segir að starfsfólk verslunarinnar hafi fengið símtal í gærkvöld þar sem því var tilkynnt um lokunina og að það ætti ekki að mæta til vinnu í dag.
„Þetta er ansi lítill fyrirvari, ég átti að vinna á fimmtudag og föstudag, svo fær maður bara símtal um að öllu sé lokað. Okkur var sagt að við fengjum laun um næstu mánaðamót en ég held að ég eigi líka inni uppsagnarfrest. Ég þarf að kanna minn rétt með það,“ segir Karen.
Umsjónaraðili verslunarinnar Kornsins að Fitjum, ung kona sem vill ekki láta nafn síns getið, staðfesti að versluninni að Fitjum hefði verið lokað en vildi ekki tjá sig um aðrar lokanir eða stöðu fyrirtækisins.
Karitas Rós Einarsdóttir, rekstrarstjóri útibúa á höfuðborgarsvæðinu, vildi heldur ekki tjá sig um málið að svo stöddu. Hún gaf blaðamanni vilyrði um að hann fengi samband við framkvæmdastjóra vegna málsins en ekki hefur tekist að ná sambandi við þann aðila.
Uppfært: Kornið hefur hætt starfsemi
Samkvæmt frétt Morgunblaðsins í morgun hefur Kornið hætt allri framleiðslu.
