Auðmaðurinn Róbert Wessmann fékk felldar niður skuldir upp á hátt í 44 milljarða í skuldauppgjöri sínu við Glitni. Þetta kemur fram í nýjasta tölublaði Stundarinnar. Samdi Róbert um að greiða 1,3 milljarða af 45 milljarða skuld sinni við bankann. Samkomulagið gerði Róbert við Glitni í árslok 2013. Viðskiptafélagi Róberts, Árni Harðarsson, losnaði við persónulegar ábyrgðir á milljarða lánum í þessu skuldauppgjöri.

Róbert Wessmann er í dag einn af umsvifamestu fjárfestum landsins og stýrir hann meðal annars hinu þekkta lyfjafyrirtæki Alvogen. Er hann forstjóri félagsins og Árni Harðarson aðstoðarforstjóri þess.

Almenningur fær ekki slíkar niðurfellingar

Ítarleg fréttaskýring er um málið í Stundinni en þar er einnig önnur frétt þar sem rætt er um málið við umboðsmann skuldara, Ástu Sigrúnu Helgadóttur. Segist Ásta ekki kannast við nein viðlíka dæmi þar sem almennur borgari hafi fengið hlutfallslega jafnmikla niðurfellingu á skuldum og telur hún þetta vera með ólíkindum. Meðal fjárfestinga Róberts eru fjölmiðlafyrirtækið Birtingur sem meðal annars gefur út tímaritin Mannlíf, Hús og híbýli og Vikuna.