„Ég held að það hljóti nú allir að hugsa ýmislegt við svona aðstæður en ég sé nú engar efnislegar forsendur fyrir slíkri ákvörðun,“ sagði Ólafur Ísleifsson, þingflokksformaður Flokks fólksins, í hádegisfréttum RÚV, aðspurður hvort hann hefði íhuga að segja af sér þingmennsku.

Kallað hefur verið eftir því að þeir þingmenn sem sátu að sumbli og töluðu mjög frjálslega um nafngreinda einstaklinga axli ábyrgð og segi af sér. Sjálfur sér Ólafur ekki forsendur fyrir slíkri ákvörðun.

Þegar hann var spurður hvort hann myndi segja sig úr Flokki fólksins sagði hann: „Nei, nei nei nei. Það er ekkert tilefni til þess af minni hálfu.“

Á stjórnarfundi Flokks fólksins í gærkvöldi var samþykkt tillaga um að Ólafur og Karl Gauti Hjaltason segðu af sér. Kolbrún Baldursdóttir, borgarfulltrúi flokksins, sagði við RÚV í gærkvöldi að niðurstaðan hefði verið einróma. „Menn voru ekki á því að hægt væri að snúa þessu til baka,“ sagði Kolbrún að fundi loknum í gærkvöldi.

Stjórnin kemur aftur saman í dag til að fara yfir málið en Ólafur segir að sá fundur geti varla talist ályktunarbær þar sem ekki var boðað til hans með nógu löngum fyrirvara líkt og kveðið er á um í samþykkt flokksins.