Þingmenn Miðflokksins og Flokk fólksins gerðu grín að Freyju Haraldsdóttur meðan þeir sátu að sumbli á barnum Klaustur við Kirkjutorg. Á upptöku sem DV hefur undir höndum má heyra einn þingmann herma eftir sel þegar talið berst að Freyju. Upptakan er nokkuð óskýr og því ekki fyllilega ljóst hver þeirra hermdi eftir sel. Upptökuna má heyra hér fyrir neðan.
Freyja segist í samtali við DV að hún hafi ekki áhuga á því að ræða nánar hegðun þingmanna. Hún segir þetta dæma sig sjálft og hún vilji ekki fara niður á þeirra plan. „Veistu ég nenni ekki að eyða orku í þetta,“ segir Freyja.
Líkt og fyrr segir er upptakan nokkuð óskýr en svo virðist sem samtalið hefjist á því að Sigmundur Davíð segir tvo þeirra sem sitja við borðið hafa sérstakan áhuga á tveimur konum. Ekki er alveg ljóst hver segir hvað hverju sinni.
Anna Kolbrún: Veistu það, ég hélt þú værir að auglýsa eftir Freyju Eyju áðan.
Gunnar Bragi: „Ég sagði bara KOMDU.“
Anna Kolbrún: „Nei, þú sagðir….[óskýrt] það er verið að kalla á okkur.
Sigmundur D: „Þessir tveir menn eiga það sameiginlegt að hafa sérstakan áhuga á tveimur konum, Freyju og …“
– Eyju.
Já.
Freyju.
Eyju.
Bergþór : Freyju Haraldsdóttur?
Já.
Já.
(Hljóð sem líkist væli í sel)
Og Albertínu.
NEI.
-NEI.
Karl Gauti: Díses kræst, mar.
Sigmundur: Þetta eru konur sem sameina þessa tvo menn.
Steingrímur J. Sigfússon, forseti Alþingis, tjáði sig um málið í hádegisfréttum RÚV þar sem hann sagði ummæli þingmannanna óafsakanleg og óverjandi. Sagði hann sárt að heyra þingmennina tala með þessum hætti um konur. Þeir væru ekki að leggja sitt lóð á vogarskálirnar í að efla traust á Alþingi.
„Ég er jafn eyðilagður og hver annar yfir þessu gjörsamlega óafsakanlega og óverjandi orðbragði sem þarna virðist hafa verið notað í þessum samtölum þingmanna. Sérstaklega finnst mér það sárt að svona skuli hafa verið talað um konur. Ég er eiginlega orðlaus yfir því og verður mér þó ekki oft orða vant,“ sagði Steingrímur sem tók fram að þingið þyrfti tíma til að fara yfir hvernig tekið verður á málinu. Fundað verði með formönnum þingflokka og forsætisnefnd á mánudag.
Á upptökunum er talað mjög frjálslega um konur eins og fyrr segir og orð eins og „apaköttur“, „klikkuð kunta“ og „kræf kerfiskerling“ notuð. Þá hæddust þingmenn að MeToo-umræðunni og sögðu Gunnar Bragi Sveinsson og Bergþór Ólasaon að Albertína Friðbjörg Elíasdóttir, þingkona Samfylkingarinnar, hefði áreitt þá og gengið á þá með kynlíf.
Í samtali við Stundina sagði Albertína að Gunnar Bragi hafi hringt í sig og beðist afsökunar. Ekkert af því sem fram hafi komið í samtalinu hafi verið satt. „Það er hrikalegt að vera ásakaður um eitthvað sem gerðist ekki,“ sagði Albertína.
Drífa Snædal, forseti ASÍ, lagði orð í belg um málið á Facebook-síðu sinni í morgun og sagði: „ „Getum við svo hætt að vera hissa á því að jafnrétti sé ekki náð þegar stjórnmálamenn þessa lands kalla konur í pólitík húrrandi klikkaðar kuntur, kræfar kerfiskerlingar, apaketti, lýsa yfir vanhæfi þeirra og greindarskorti, hafa skoðanir á hvort þær séu hot eða not, segja þær hafa grenjað sig inn á þing, hvort farið sé að falla á þær og fleira og fleira, allt á einni kvöldstund.“
Þá sendu þingkonurnar Inga Sæland, Oddný Harðardóttir og Silja Dögg Gunnarsdóttir frá sér yfirlýsingu þar sem ummæli þingmanna Miðflokksins og Flokks fólksins eru fordæmd. Gera þær þá kröfu að málið verði tekið upp í forsætisnefnd þingsins og sögðu þær ummælin lýsa skammarlegum viðhorfum og stækri kvenfyrirlitningu.
