„Við höfum verið með hana í ansi mörg ár. Það var kveikt í henni fyrsta árið, þá var kveikt í henni á Þorláksmessu og ég hugsaði með mér „díses, náðu þeir henni á síðasta degi“. Svo komu nokkur ár þar sem hún var brennd. Svo hefur hún sloppið í nokkur ár, eins og í fyrra þá slapp hún,“ sagði Þórarinn Ævarsson, framkvæmdastjóri IKEA, í viðtali í þættinum Bakaríið á Bylgjunni í morgun.

IKEA-geitin, sem er sett upp í aðdraganda jóla skammt frá versluninni í Kauptúni í Garðabæ, er fyrir löngu orðin fræg fyrir að óprúttnir aðilar koma og kveikja í henni. Um er að ræða fyrirbæri sem á sér líka stað erlendis, jólageitin í bænum Gävle í Svíþjóð hefur verið brennd til kaldra kola nánast á hverju ári frá því hún var fyrst sett upp árið 1966. Hér má sjá myndband frá brunanum 2016, tekið skal fram að geitin í Gävle tengist ekki verslunum IKEA:

Geitin í Kauptúni er engin smásmíði, hún er sex metra há, átta metrar þegar hornin eru talin með, þyngdin er þrjú tonn þeg hún er þurr og 6 til 7 tonn í bleytu. Geitin er gerð úr hálmi sem er settur utan á greind, Þórarinn segir að grindin lifi af brunann. Hálmurinn er íslenskur: „Við keyrum austur í land og sækjum okkur strá. Þetta er íslenskur hálmur,“ segir Þórarinn. Utan á geitinni er svo mikið af LED-perum, því er hún mjög verðmæt og vill Þórarinn gera hvað sem er til að koma í veg fyrir að hún verði aftur brennd niður, er þar á meðal notast við myndavélakerfi sem getur greint andlit:

„Við erum með gaddavírsgirðingar, rafmagnsgirðingar. Síðast vorum við með verði allan sólarhringinn við geitina. Það eru líka komnir hreyfiskynjarar.“

Aðspurður hvað gerist ef einhver setti hreyfiskynjara í gang við geitina segir Þórarinn: „Þá gerist eins og í bíómyndunum, þá kemur allt í einu myndvél sem snýst beint að þér. Þetta er eins og í Tomma og Jenna.“

Þórarinn var svo fenginn til að svara hvort það væri hægt að nota boga og ör með eldi til að kveikja í geitinni: „Það er bara svo mikið rok alltaf í Kauptúninu. Þú þyrftir að vera mjög góður.“