Stjórn Glitis HoldCo, sem sér um að selja eignir slitabús Glitnis fyrir erlenda vogunarsjóði, býðst til að halda áfram störfum ef stjórnarmeðlimir fá rúmlega 73 þúsund krónur á tímann. Glitnir HoldCo var stofnað eftir að slitabú Glitnis borgaði ríkinu stöðugleikaframlag árið 2015 og hefur það hlutverk að breyta eigum félagsins, sem eru metnar á rúmlega 1,8 milljónir evra, í reiðufé og greiða það út til hluthafa. Hluthafarnir eru flestir erlendir vogunarsjóðir. Stjórn var kjörin í janúar 2016 til tveggja ára, í henni sitja Steen Parsholt, Tom Grøndal og Mike Wheeler.

Greint er frá því í Viðskiptablaðinu í dag að stjórnin hafi boðist til að sitja áfram ef þeir fái laun upp á 8,8 milljónir á ári fyrir fimm daga vinnu. Það jafngildir rúmlega 600 þúsund krónum á tímann eða 73 þúsund á tímann. Bætist það ofan á milljarða króna í bónusgreiðslur. Fimm starfsmenn vinna hjá Glitni auk stjórnarinnar og nam launakostnaðurinn frá janúar til september 2017 rúmlega 400 milljónum króna. Samkvæmt ársreikningi 2016 voru laun Ingólfs Haukssonar forstjóra Glitnis rúmlega 88 milljónir króna, eða 7,3 milljónir á mánuði.