Áslaug Friðriksdóttir borgarfulltrúi og frambjóðandi í leiðtogakjöri Sjálfstæðisflokksins vill að farveitur á borð við Uber og Lyft hefji starfsemi í Reykjavík sem fyrst. Telur hún að slíkir samgöngumátar, sem og fyrirhuguð Borgarlína, muni hafa jákvæð áhrif á samgöngumál borgarinnar.

Í viðtali í útvarpsþættinum Harmageddon á X-inu 977 í morgun sagði Áslaug að Sjálfstæðismenn ættu að gefa Borgarlínu séns: „Ekki drepa það bara í fæðingu með þeim orðum að það sé ómögulegt og muni leiða til alls ills. Það er bara ekki svo. Ég styð það að við byggjum einhverskonar hraðvagnakerfi sem að auðveldar fólki að sleppa einkabílnum allavega stöku sinnum því við komum ekki öllum bílunum á göturnar ef við gerum ekki neitt.“

Áslaug segir hins vegar að Borgarlína geti ekki verið svar við umferðarvandanum. „Það er ekki hægt að sitja aðgerðalaus og vísa bara í einhver framtíðarverkefni. Þetta finnst mér vera einkenni meirihlutans í Reykjavík.“ Hún segir að það þurfi að leita lausna strax: „Það þarf að hleypa farveitunum sem fyrst inn í okkar samfélag. Uber og Lyft. Þetta er þjónusta sem er í boði erlendis því hún er þægilegri, ódýrari og þjónustar fólk eins og það vill þjónustuna. Svo deilibílar, en við erum kannski ekki komin þangað í hegðun okkar. Þetta getur haft hröð áhrif á umferðarmálin í stað þess að bíða eftir að byggja risastór mislæg gatnamót og Borgarlína opnar ekki strax.“

Hún segist vera frambjóðandi sem treystandi sé í samstarf með öðrum. „Sjálfstæðismenn verða að átta sig að það verður aldrei hreinn meirihluti. Aldrei, held ég. Pólitíska landslagið er þannig, það er bara þróunin í allri pólitík allsstaðar. Þess vegna verðum við að vera með stefnu þar sem við getum tekið saman höndum með flokkum sem eru líkir okkur og við sjáum að við getum unnið með. Við verðum að setja í forystu fólk sem getur rétt út hendina og vill vinna með öðrum.“