„Fjallkonan hefur ávallt verið og á að vera kona“ segir Jón Valur Jensson, guðfræðingur, bloggari og frambjóðandi Íslensku þjóðfylkingarinnar á Facebook síðu eftir að tilkynnt var að dragdrottning yrði fjallkona í ár.

Eins og fram kom í morgun þá verður dragdrottningin Gógó Starr önnur tveggja fjallkona í ár í hátíðarhöldunum á þjóðhátíðardaginn í Reykjavík. Þetta kom fram í viðtali á gayiceland á ensku og DV fókus á íslensku. Gógó heitir í raun og veru Sigurður Heimir Guðjónsson og sagist hafa dreymt um þetta síðan hann fór að koma fram í dragi. Þetta er ekki fyrsti heiðurinn sem Gógó hlotnast því að í fyrra var dragdrottningin kynnir á Grímunni, verðlaunaafhendingu leiklistarfólks.

Þóknun við örsmátt félag

„Að karlmaður fari í hlutverkið 17. júní næstkomandi, snýst minna um fyrirsjáanlega hugaróra örlítils prómill þjóðarinnar heldur en hitt, að „nýir“ ráðandi aðilar í Ráðhúsinu (með aðeins 46,35 prósent fylgi á bak við sig) vilja enn einu sinni þóknast örsmáu félagi (sem var 189 manns, síðast þegar upplýst var um félagatal) og taka þess vegna, í aulalegri meðvirkni, þá ákvörðun að tefla fram karlmanni í stað alvöru-fjallkonu!“

Þetta er ekki í fyrsta sinn sem fjallkonuhefðin er brotin upp en í fyrra fór transkonan Eva Ágústa Aradóttir í hlutverk fjallkonunnar á hátíðarhöldunum í Hafnarfirði.

Jón Valur Jensson hefur margoft lýst skoðunum sínum sem margir telja vera íhaldssamar, til dæmis í innflytjendamálum og trúarlegum málum. Hefur hann til dæmis talað hart gegn þungunarrofum.

„Jafn vel helgustu daga þjóðarinnar vill hin „nýja“ borgarstjórn nota bara að eigin vild og breyta í skrípaleik“ segir Jón.

Jón Sigurðsson myndi snúa sér í gröfinni

Við þessa færslu líkar Guðmundur Þorleifsson, formaður flokksins en miklar umræður hafa skapast vegna færslunnar og eru þar margir sammála honum. Einn maður segir:

„Við höfum fullt af fallegu kvenfólki. Af hverju er verið að sýna fjallkonuhlutverkinu svona mikið virðingarleysi að láta uppmálaðan karlmann með hárkollu vera fjallkonu.“

Kona ein segir að fjallkonan þurfi ekki endilega að vera fríð en hún þurfi að vera kona. Þetta sé því virðingarleysi gagnvart hlutverkinu.

Önnur segir: „Jón Sigurðsson myndi eflaust snúa sér við í gröfinni núna og líka flestar okkar formæðra sem þraukuðu í gegnum aldirnar hér. Hér er verið að hæðast að þeim sem konum.“

Ekki eru allir þó sammála Jóni, sumir segja hann gera stórmál úr engu og aðrir fagna fjölbreytileikanum.

Einn maður bendir Jóni á að 189 manns séu fleiri en kusu Íslensku þjóðfylkinguna í borgarstjórnarkosningunum í maí. Flokkurinn fékk alls 125 atkvæði og hefur enginn flokkur fengið færri atkvæði í Reykjavík.