74 prestar og djáknar eru á leið til Þýskalands á vegum kirkjunnar en alls telur hópurinn 102 með mökum. Kostnaður vegna ferðarinnar er minnst 10 milljónir en kirkjumálasjóður greiðir minnst 100 þúsund með hverjum þátttakenda. Ferðin stendur yfir í fjóra daga en þann 6. júní verður þess minnst í Wittenberg í Þýskalandi að 500 ár eru liðin frá því að kaþólski munkurinn Marteinn Lúther negldi mótmælaskjal í 95 greinum á dyr Hallarkirkjunnar í Wittenberg. Er sá gjörningur talinn marka upphaf siðabótarinnar. Til prestastefnunnar boðar Agnes M. Sigurðardóttir, biskup Íslands.

Á Íslandi eru tæplega 150 starfandi prestar og ljóst að um helmingur presta verður ekki á landinu þessa daga. DV spurðist fyrir málið í vikunni og var í kjölfarið birt tilkynning á kirkjan.is. Þar segir að um fræðsluferð sé að ræða og sérstaklega tekið fram að kostnaðurinn vegna prestastefnunnar sé hinn sami og var á Ísafirði 2014. Segir að kostnaður sé innan ramma fjárhagsáætlunar kirkjumálasjóðs. Um ferðina segir:

„Þátttaka í ferðinni miðar að tengslamyndun við fræðimenn í Þýskalandi og auknum skilningi á siðbótinni í sögu og samtíð.“

Þegar DV spurðist fyrir um málið fengust þau svör að prestar myndu sjálfir greiða einn þriðja við kostnað eða um 50 þúsund krónur en þeir gætu sótt styrk fyrir þeirri upphæð meðal annars til stéttarfélaga en kostnaður kirkjumálasjóðs sé um 10 milljónir. Gerðar hafa verið ráðstafanir vegna fjarveru prestanna og segir í tilkynningu að:

„Afleysingar vegna fjarveru þeirra sem taka þátt eru skipulagðar í hverju prófastsdæmi og er leitað til eftirlaunapresta til þess að aðstoða við þær.“

Þá mun dómsmálaráðherra komast úr storminum sem geisað hefur eftir ákvörðun hennar við val á dómurum en Sigríður Á. Andersen mun flytja ávarp við setningu prestastefnunnar.